15 qarasha – Qazaqstannyń qarjy júiesindegi mańyzdy merekelerdiń biri. Bul kúni elimizdiń basty ekonomikalyq nyshany – ulttyq valiýta, teńge ainalymǵa engizilgen. 1993 jyldyń dál osy kúni Qazaqstan óz valiýtasyn shyǵarý arqyly ekonomikalyq táýelsizdigin nyǵaityp, derbes qarjy júiesiniń negizin qalady.
Teńgeniń tarihy
Keńes Odaǵy ydyraǵannan keiin Táýelsiz Qazaqstannyń aldynda asa jaýapty mindet turdy – óz aqshasyn engizý. Bul sheshim eldiń ekonomikalyq egemendigin qamtamasyz etýdiń basty sharty bolatyn.
1993 jyly qarashanyń 15-inde burynǵy Prezident Nursultan Nazarbaevtyń Jarlyǵymen teńge resmi túrde ainalymǵa endi. Alǵashqy banknottar Ulybritaniiadaǵy Harrison and Sons fabrikasynda basylyp, elge jetkizildi.
Alǵashqy teńgelerde qazaq halqynyń uly tulǵalary – Ál-Farabi, Súiinbai, Qurmanǵazy, Abylai han, Abai, Shoqan Ýálihanov beinelengen. Bul – teńgeniń tek qarjy quraly emes, rýhani jáne tarihi máni zor simvol ekenin kórsetti.
Damýy men qazirgi kelbeti
1995 jyldan bastap teńgeni elimizdiń óz aýmaǵynda shyǵarý isi jolǵa qoiyldy. Qazir Qazaqstan teńgeni tolyqtai óz óndirisinde basyp shyǵaratyn sanaýly elderdiń qatarynda.Jańa dizaindaǵy banknottar men monetalar qorǵanys deńgeii joǵary, zamanaýi standarttarǵa sai daiyndalady. Teńge búginde ulttyq ekonomikanyń tiregi ári el maqtanyshy.
Teńge – turaqtylyq pen senim simvoly
Ulttyq valiýta – memlekettiń qarjylyq táýelsizdigin aiqyndaityn mańyzdy belgi. Teńge ainalymǵa engen sátten bastap eldiń qarjy júiesi qalyptasty, bank sektory damydy, sheteldik investitsiialar tartyldy.Teńge – halyq eńbeginiń baǵasy men eldiń ekonomikalyq qýatyn aiqyndaityn basty qural. Onyń turaqtylyǵy – memlekettiń senimdi damýynyń kepili.
