Balalarǵa qatysty zorlyq-zombylyqpen kúres – memleket úshin basym baǵyttardyń biri. Bul pikirdi QR Prezidentiniń keńesshisi Erlan Qarin aitty, dep habarlaidy "Ult aqparat".
«Sońǵy oqiǵalarǵa bailanysty jeli paidalanýshylary balalarǵa jasalǵan zorlyq-zombylyqqa jazany kúsheitý kerek dep jazyp júr. Shyn máninde mundai sharalar Memleket basshysynyń bastamasymen ótken jyly qabyldanǵan edi. Prezident 2019 jyldyń 2 qyrkúieginde Qazaqstan halqyna arnalǵan alǵashqy Joldaýynda seksýaldyq zorlyq-zombylyq, pedofiliia, esirtki taratý, adam saýdasy, áielderge qarsy turmystyq zorlyq-zombylyq jáne jeke adamǵa, ásirese balalarǵa qarsy basqa da aýyr qylmystar jazasyn jedel túrde qatańdatýdy tapsyrdy», - dep jazdy Erlan Qarin óziniń Telegram paraqshasynda.
Prezident keńesshisi tiisti zań jobasynyń kúzde Parlamentke túskenin atap ótti.
Al 30 jeltoqsanda Prezident «Qazaqstan Respýblikasynyń keibir zańnamalyq aktilerine qylmystyq, qylmystyq-protsestik zańnamany jetildirý jáne jeke adam quqyqtarynyń qorǵalýyn kúsheitý máseleleri boiynsha ózgerister men tolyqtyrýlar engizý týraly» Zańǵa qol qoidy jáne ol 2020 jyldyń 1 qańtarynda kúshine endi.
«Zańnyń jańa normalaryna sáikes, ortasha aýyrlyqtaǵy zorlyq-zombylyq qylmysy aýyr qylmys sanatyna aýystyryldy. 14 jasqa tolmaǵan balalarǵa zorlyq-zombylyq úshin 20 jylǵa deiin bas bostandyǵynan aiyrý nemese ómir boiy qamaý jazasy kózdeledi. Odan bólek, pedofiliia faktilerin jetkizbeý, jasyrý, burmalaý úshin de jaýapkershilik belgilengen. Bul endi 6 jylǵa deiin bas bostandyǵynan aiyrýy múmkin aýyr qylmys bolady. Balalarǵa qatysty zorlyq-zombylyqpen kúres máselesi - bizdiń memleket úshin basym baǵyttardyń biri», - dedi Erlan Qarin.
