Búgin qazaq halqynyń ejelden kele jatqan merekesi - kórisý kúni. Kórisý salty bir kúnniń aiasymen shektelip qalmaidy, jyl boiy jalǵasa beredi, dep habarlaidy "Ult aqparat".
Kórisý — adamdardyń bir-birine amandasyp, jaqsylyq tileitin qaýyshý merekesi ǵana emes, sondai-aq jasy úlkenderge izet kórsetip, iltipat bildiretin dástúrli kórinis.
Kórisý salty bir kúnmen shektelip qalmaidy, jyl boiy jalǵasa beredi.
Bul kúni jasy kishiler qala-aýyldaǵy aqsaqal-ájeleriniń úiine baryp, kórisip, iltipat bildiredi. Jasy úlkender kishilerge bata beredi.
Sondai-aq, úlkender qol alysyp, alaqandaryn aiqastyryp jatsa, áiel adamdar aldymen oń iyǵyn, sosyn sol iyǵyn túiistiredi.
Bul mereke elimizdiń batys óńirimen qosa Syr boiynda, Qostanai, Torǵai aimaǵynda, reseilik Astrahan, Saratov, Samara, Orynbor oblystarynda turatyn qazaqtar arasynda keńinen toilanady.
Tarih ǵylymdarynyń kandidaty Jańabek Jaqsyǵalievtiń aitýynsha, bul – óskeleń urpaqty izet pen meiirimge, aýyzbirshilik pen kishipeiildilikke, tatýlyq pen baýyrmaldyqqa bastaityn erekshe úrdisterdiń biri.
