Sybailas jemqorlyqqa qarsy agenttik qyzmetkerleri Shieli aýdandyq bilim bólimi baǵasy 14 million teńgeden asatyn bir litr tabiǵi sút satyp alýdy josparlaǵanyn anyqtady. Qaita tekserilgennen keiin sút baǵasy 223 teńgege deiin tómendetilgen. Sybailas jemqorlyqqa qarsy agenttik qyzmetkerleri baǵa monitoringi kezinde baǵany qoldan kóterýge bailanysty jáne basqa da osyndai derekterdi anyqtaǵan, - dep habarlaidy Tengrinews.kz tilshisi.
"Qarmaqshy aýdanynyń №275 orta mektebi balalarǵa 1 670 143 teńgeniń kúrteshesin satyp alýdy josparlaǵany anyqtaldy. Jalpy 208 million teńgeden asa somaǵa 125 kúrteshe satyp alý josparlanǵan. Usynysqa sáikes taýar quny 16 701 teńgege deiin tómendetilgen. Jalpy satyp alý somasy 2 million teńgeden asty. 206 680 197 teńge kólemindegi memlekettik qarajat qaitaryldy", - dedi QR Sybailas jemqorlyqqa qarsy is-qimyl agenttiginiń Qyzylorda oblysy boiynsha departamenti basshysynyń birinshi orynbasary Ǵaliia Álimqulova.
Bul birinshi jaǵdai emes ekeni belgili boldy. Antikor oblystyń 11 memlekettik mekemesi dizel otynyn 280 teńgeden, al AI-92 markaly benzindi 205 teńgeden satyp alýdy josparlaǵanyn anyqtady.
"QR Energetika ministriniń 2015 jylǵy 19 mamyrdaǵy № 361"Baǵalaryna memlekettik retteý belgilengen bólshek saýdada ótkiziletin munai ónimderine shekti baǵalardy belgileý týraly" buiryǵyna sáikes dizel otynynyń litri 230 teńgeden, al AI-92 markaly benzin baǵasy 182 teńgeden aspaýy tiis. Memlekettik satyp alý lottaryn qaita qaraý týraly usynystardyń qorytyndysy boiynsha 38 243 349 teńge somasynda biýdjet qarajaty únemdeldi", - dep atap ótti Sybailas jemqorlyqqa qarsy qyzmet ókili.
2022 jylǵy eki aidyń qorytyndysy boiynsha 17 mekemege jiberilgen usynystar nátijesinde jalpy somasy 351 230 304 teńge biýdjet qarajaty únemdelgen.
