9 qarashadan beri oblys ortalyǵyndaǵy blok beketter arqyly 56 myńnan astam kólik kirip-shyqqan, dep habarlaidy Pavlodarnews.kz saity.
Bul týraly onlain baspasóz jiynynda Pavlodar qalasynyń ákimi Erjan Imansliam málim etti.
- Bas sanitarlyq dárigerdiń qaýlysyna sáikes 9 qarashadan qalaǵa kireberisterde 5 blok beket ornatylǵan bolatyn. Osyǵan deiin beketterden jumys ornynan alǵan anyqtamalar arqyly ótkizip kelgen bolsa, erteńnen bastap pvlinfo.kz saity arqyly tekserip ótkizedi. Búginde saitqa jeke jáne zańdy tulǵalardan 15 myńnan astam ótinish kelip tústi, - dedi Erjan Imansliam.
Qala ákiminiń aitýynsha, sońǵy táýlikte blok beketterden 12236 kólik kirip-shyqqan bolsa, 210 kólik keri qaitarylǵan. Al, 9 qarashadan beri beketter arqyly 56 myńnan astamy kirip-shyqqan.
Sondai-aq shahar basshysy karantindik shekteýlerge qatysty barlyq suraqtar boiynsha 109 bailanys nómirine habarlasýǵa bolatynyn atap ótti. Búginde 109 ortalyǵyna táýligine 2 myńnan astam qońyraý túsýde.
Aita keteiik, Pavlodar qalasynda koronavirýs juqtyrǵandar sany 3327-ge jetti. Ótken táýlikte 43 adamnan KVI anyqtaldy. Onyń ishinde 22 naýqas buryn KVI juqtyrǵandarmen bailanysta bolǵandar. Oǵan qosa, 43 adamnyń ishinde 10-y – bala, altaýy – 60 jastan asqan turǵyndar. Barlyq naýqastarmen bailanysta bolǵan 148 adam anyqtaldy. Qazirgi ýaqytta qalada indettiń ósimi 1,3 paiyzdy quraidy.
