Halyqtyq kommýnisterden sailanǵan depýtattar áiteýir halyqtyń jaiyn oilap jatady ǵoi. Jýyrda Aiqyn Qońyrov bastaǵan olar taǵy da jai jatpai Ulttyq banktyń tóraǵasy Daniiar Aqyshevke saýal joldap, Úkimettiń 2015 jyldyń sáýir aiynda halyqtyń ipotekalyq qaryzdaryn qaita esepteý úshin arnaiy baǵdarlamamen bólgen 130 mlrd. teńgesiniń taǵdyry ne bolǵanyn surady.
Osy 130 mlrd. teńgemen 2004 jyldyń 1 qańtarynan 2009 jyldyń 31 jeltoqsanyna deiin ipotekalyq borysh alǵandardyń qaryzy qaita eseptelinedi eken. Kommýnister nege osy qysqa merzim ǵana qamtylǵanyn suraidy. Boryshkerlerdiń qabyrǵasy sógilip, teńgeniń naǵyz qunsyzdanǵan shaǵy 2014 jyldyń aqpany edi ǵoi, osy kezeńdegi boryshkerlerdiń qaryzy nege qamtylmaǵan, deidi depýtattar. Sonymen qatar olar baǵdarlamany oryndaityn bankterdiń qaisy 130 mlrd-tyń qanshasyn alǵanyn bilgisi kelipti jáne olardyń tizimin berýdi talap etken. Bul árine, «barmaq basty, kóz qystymen» tek alpaýyttardyń bankteri ǵana asap qaldy ma degendi bilgileri kelgeni ǵoi...
Depýtattar saýalynyń eń salmaqty jeri mynadai: baǵdarlamamen kelgen qarajatty maqsatsyz shyǵyndarǵa qai bank jumsap jibergenin kórsetińiz. Olarǵa qandai sharalar qoldanyldy? Sonymen qatar baǵdarlama búginge deiin qansha boryshkerdi qamtydy? Boryshkerler tarapynan baǵdarlamaǵa qatysqan ekinshi deńgeidegi bankterdiń qanshasynyń ústinen qansha aryz-shaǵymdar tústi?
Bul saýaldarǵa jaýap berý qiyn emes, biraq kókeleri men jákeleriniń bankterin «búldirip jatyr» dep kórsetýge Aqyshevtyń aibyny jeter me eken?
E.Serikbaev, sarapshy
Ult portaly
