Úkimette premer-ministr Baqytjan Saǵyntaevtyń tóraǵalyǵymen ótken otyrysta QR bilim jáne ǵylym ministri Erlan Saǵadiev UBT-nyń jańa formatynyń erekshelikteri týraly baiandady, - dep habarlaidy "Ult aqparat" kaz.tengrinews.kz portalyna silteme jasap.
Ministr óz sózinde vedomstvonyń UBT suraqtarynda "Qazaqstan tarihy" pánin saqtap qalýdy jaqtaitynyn atap ótti.
"Eki usynys kóbirek aityldy. Men ministrliktiń ustanymyn aitqym keledi. Birinshisi, UBT-dan "Qazaqstan tarihy" pánin alyp tastaý. Shyn máninde, búginge ol eki ret tapsyrylyp júr - mektepte jáne UBT-da. Biraq biz bul pándi qaldyrý kerek dep esepteimiz, sebebi, qoǵamnyń pikiri boiynsha, pán óte mańyzdy jáne UBT-da bolýy tiis. Ekinshisi, "Altyn belgi" iegerlerin jáne túrli olimpiadalar men konkýrstardyń jeńimpazdaryn, ǵylymi joba jeńimpazdaryn UBT-dan bosatý. Biz bul usynysty da qoldamaimyz. UBT-ny barlyǵy tapsyrýy kerek dep esepteimiz", - dedi Erlan Saǵadiev.
Erlan Saǵadievtiń aitýynsha, ministrlik qorytyndy attestatsiialaýdy bólý jumystaryn júrgizgen. Endi túlekter mektepti bitirý synaǵyn jáne JOO-ǵa qabyldaý emtihany retinde UBT tapsyrady. Mekteptegi qorytyndy attestatsiia 5 pánnen turady, onyń 4-ýi mindetti, 1 pán - tańdaý boiynsha.
UBT JOO-ǵa qabyldaý emtihany jáne memlekettik granttardy bólý júiesi retinde saqtalady, biraq onyń formaty ózgeredi. Buryn 5 pánnen 125 suraq berilip, onyń ishinen 4 pán boiynsha 100 suraq esepteletin. Al 2017 jylǵy UBT formatynda 120 suraq qarastyrylyp, barlyǵy esepteledi. Keibir suraqtardyń jaýabyna 2 ball beriletindikten, eń joǵarǵy kórsetkish - 140 balǵa teń.
Saýaldar 5 pánnen qoiylady, olardyń 3-ýi mindetti, 2-ýi talapker josparlaǵan JOO-daǵy mamandyqqa bailanysty beiindik pán bolady. Testileý ýaqyty da ózgermeidi - 3 saǵat 30 minýt. Ótý baly da ózgergen joq - 50 ball.
2017 jyly UBT 20 maýsym men 1 shilde aralyǵynda ótedi, sondai-aq túlekterge ony 2017 jyldyń tamyzy men 2018 jyldyń qańtarynda qaita tapsyrýǵa múmkindik beriledi.
Aita keteiik, UBT beiindik pánderi 20 saýal men onyń bes túrli jaýap nusqasynan turady. Sonymen qatar, túlekterge 10 tapsyrma berilip, onyń kóptegen jaýaptarynyń ishinen durystaryn tańdaý usynylady. Beiindik pánderdi testileýdegi jaýaptardyń birneshe nusqasynyń bolýy talapkerdiń naqty taqyrypty qanshalyqty jaqsy biletindigin tekserýge múmkindik beredi. Sondai-aq birneshe jaýap nusqasy arqyly testileý jaýaptardy kezdeisoq belgileýdi boldyrmaýǵa kómektesedi.
Al osyǵan deiin mamandar UBT-nyń jańa formatynyń basymdyqtary jaily pikir bildirgen bolatyn.
.jpeg)