Israil aǵam Saparbai telefon shaldy búgin. Sálem-saýqat, az-kem bákin-shúkin áńgimeden keiin: "Ótkende kitabyńdy berip eń, sol túni oqyp shyqtym. Erekshe áser etti. Sol túni saǵan arnap óleń jazdym. Ataýyn - "Moiyndaý" dep qoidym. Bul ataýdyń ishine bári kirip tur: ómirdi, ólimdi, óleńdi, ýaqytty, sender poiaziiaǵa ákelgen jańa tynys, bólek oi, basqa deńgei, tyń órnekti...kárilik pen jastyqty, alma-kezek dúniiany bárin-bárin moiyndadym. Aqberenjan, óziń bar, qatarlastaryń bar - senderge qazaq poeziiasy amanat! Sender qazaq óleńin jetimsiretpei, jańa biikke kótere alatyndaryńdy túsindim, moiyndadym" - dedi.
Qatty tolqydym. Qazaq poeziiasynyń klassiginen mundai sóz estý - ońai sharýa emes. Maqtap turǵan joq, jaýapkershilikti sezindirip tur. Oipyrym-ai, alqyna-qylqyna aǵama raxmet aityp, oilanyp qaldym.
Talai aǵamyz arqamyzdan qaqty, maqala jazyp, aq jol tiledi, aqyl-keńesin aitty. Endi mine, óleń arnap jatyr. Laiyqpyz ba, joq pa?! Úlken jaýapkershilik! Úlken salmaq!
Ámirxan aǵam keterinen bir apta buryn: "Ái, bahadúr, senderge ádebietti senip tastap ketýge bola ma?!" - dep esti shyǵarar suraq qoiyp edi. "Joq, bolmaidy, daiyn emespiz" - dep edim sonda.
Al, Israil aǵaǵa ne deýim kerek edi?!.. "Moiyndaýyn" únsiz ǵana qabyldadym.
P.S. Bul óleńdi maqtanyp salyp otyrǵam joq. Zamandastaryma oi salsam dep edim.
Aqyn Aqberen Elgezektiń feisbýktegi jazbasynan
Moiyndaý
Aqberen Elgezekke
Biz osylai ólemiz,
Biz osylai týǵanbyz.
Ahirettiń eline betimizdi burǵanbyz.
Elikpeidi Es pen Dert ertegidei erteńge,
Jeńimizdi tartpaidy jelik qýǵan Dýman-qyz.
Biz osylai ólemiz,
Biz osylai týǵanbyz.
Álimsaqtan árimiz,
Bolymsaqtan berimiz,
Jatyp qalǵan jambaspyz,
Qatyp qalǵan terimiz.
Kenezesi qashannan keýip qalǵan týlaqpyz,
Kejegesi kekjiip keiin tartqan kerimiz.
Quzdan qulap,
Muz qushqan mýmiiamyz, qalyppyz,
Astary joq, tysy bar, ańdaǵanǵa anyqpyz.
Aǵyn sýdan aqaba,
Qaq qalady jańbyrdan...
Ainymaǵan baqadan badana kóz halqpyz!
Jetegimiz – Jelbýaz,
Mekenimiz – Óli kól.
Jaralǵanbyz áýbasta Adam ata teginen.
Ámpei-jámpei janasqan
Perishte emes, Perimen
Áýmeserdiń beibaqpyz túsip qalǵan belinen...
Óli kólde kóp baqa ózeýreidi keshkilik,
Áýleki áýen ásire áýdem jerge estilip.
Tula boiy jyr, ańyz
Biri «uly», biri «abyz»
Aqyndarmyz aǵzasy azyp-tozǵan eskirip...
Sonyń biri myna Men:
Azǵan,
tozǵan,
eskirgen,
Keleshektiń kespirin kelimsektei kesh bilgen.
Ózi ǵana kúletin, ishi ulyp júrgenmen,
Ózi ǵana biletin «kem emesin eshkimnen».
... Biz osylai týǵanbyz.
Biz osylai ólemiz,
Taǵdyr taqyr kállaǵa ne salsa da kónemiz.
Jadymyzda – jańa jyr,
Janymyzda – eski óleń.
Kókjiekten ári asyp kóz ushyna enemiz.
Biz osylai týǵanbyz.
Biz osylai ólemiz...
Israil Saparbai
08.06.2016 j.
