Búgin QR Ulttyq ekonomika ministri Qýandyq Bishimbaev QR Parlament Senatynyń Ekonomikalyq saiasat, innovatsiialyq damý jáne kásipkerlik komiteti múshelerimen kezdesti. Baq.kz tilshisiniń habarlaýynsha, kezdesý barysynda Senat depýtattary ministrge «ekonomika damyp, kórsetkishter jaqsaryp jatyr deisizder, onda nelikten baǵalar jyldan-jylǵa sharyqtap barady?» dep suraqty tótesinen qoidy. Senatorlar buny halyqa kúrdelendirmei, qarapaiym tilmen túsindirýdi surady.
«Ótken jyldyń 1 qazanynan bastap biylǵy 1 qazanǵa deiin infliatsiia deńgeii 16 paiyzdan asyp otyr. Al 1 qańtardan 1 qazanǵa deiin infliatsiia 5,6 paiyzdy qurady. Bul ótken jyldyń qazan, qarasha, jeltoqsan ailarynda baǵa eń kóp ósken degendi bildiredi. Olar bizdiń 8 aidyń infliatsiiasynyń kórsetkishine kirmei, ótken jylda qalyp ketti. Degenmen, ótken jylǵy 1 qazannan biylǵy 1 qazanǵa deiin infliatsiia deńgeii 16 paiyzǵa jetti. Ony biz moiyndap otyrmyz. Byltyrǵy jyldyń sońynda infliatsiia deńgeii joǵarylaǵanymen, biyl baǵa tek 5,6 paiyzǵa qymbattady. Teńge baǵamynyń ózgerýine bailanysty, importtalǵan taýarlardyń kóbiniń, dári-dármektiń baǵasy ósti. Solai túsindirýge bolady, árine bul makroekonomikalyq jaǵynan tehnikalyq jaýap. Ony qarapaiym tilmen túsindirý qiyndaý bolady», - dedi Q.Bishimbaev.
Atap ótsek, búgingi kezdesý barysynda Qazaqstan Respýblikasy Prezidentiniń 2015 jylǵy 30 qarashadaǵy «Qazaqstan jańa jahandyq naqty ahýalda: ósý, reformalar, damý» taqyrybyndaǵy joldaýyn iske asyrý sheńberinde ekonomikalyq básekelestik jáne monopoliiaǵa qarsy retteýdi yntalandyrý jónindegi zańnamalyq bastama máseleleri talqylandy.
Eskertý!
Baq.kz saitynda jariialanǵan avtorlyq materialdardyń barlyq quqyqtary qorǵalǵan jáne aqparat agenttiginiń menshigi bolyp tabylady. Kóshirip basý redaktsiianyń ruqsatymen júzege asady. Materialdy kóshirip basý kezinde Baq.kz saityna tóte silteme kórsetý talap etiledi.
