Kókshetaýda balalardyń internettegi qaýipsizdigin tekserý barysynda kámeletke tolmaǵan qyzben kezdesýge árekettendi degen kúdikke ilingen er adam anyqtaldy, dep habarlaidy ult.kz.
«Jańa adamdar» qozǵalysynyń málimetinshe, belsendiler 12 jastaǵy qyzdyń jalǵan paraqshasyn ashyp, áleýmettik jelidegi yqtimal qaýipterdi baqylaǵan. Kóp uzamai qoldanýshylardyń biri bailanysqa shyǵyp, áńgime mazmunyn orynsyz arnaǵa burǵan. Qyzdyń jasy birneshe ret aitylǵanyna qaramastan, ol hat almasýdy jalǵastyrǵan.
Uiym ókilderiniń aitýynsha, er adam jynystyq sipattaǵy materialdar jiberip, kezdesýdi uiymdastyrý maqsatynda páter jaldaǵan. Alaida belgilengen orynǵa balanyń ornyna qozǵalys belsendileri barǵan.
Olardyń málimetinshe, kúdikti 2001 jyly týǵan Shansanhan Beibarys bolyp shyqqan. Jinalǵan materialdar quqyqtyq baǵa berý úshin quqyq qorǵaý organdaryna tapsyryldy.
«Jańa adamdar» qozǵalysy balalardyń tsifrlyq keńistiktegi qaýipsizdigine qatysty monitoring jumystaryn jalǵastyratynyn málimdedi.
Azamattyń is-áreketine quqyqtyq baǵa tergeý qorytyndysy boiynsha berilip, tiisti protsessýaldyq sheshim qabyldanady.
