Májilis depýtaty Nurgúl Taý Premer-ministr Oljas Bektenovtiń atyna depýtattyq saýal joldap, elimizdegi stýdenttik jataqhana tapshylyǵy máselesin kóterdi, dep habarlaidy ult.kz.
Depýtattyń aitýynsha, Memleket basshysy jastarǵa qolaily jaǵdai jasaýǵa, bilim berý infraqurylymyn damytýǵa jáne adami kapitaldyń sapasyn arttyrýǵa erekshe nazar aýdaryp keledi. Osyǵan bailanysty stýdentterdiń qaýipsiz ári sapaly ortada bilim alýy memlekettik saiasattyń mańyzdy baǵyttarynyń biri sanalady.
Ulttyq statistika biýrosynyń málimetine sáikes, 2025–2026 oqý jylynyń basynda Qazaqstanda 678 myń stýdent bilim alǵan. Onyń ishinde 364 myńy – óńirlerden kelgen jastar. Resmi derekter boiynsha 115 myń stýdent jataqhanaǵa muqtaj bolsa, olardyń 95 myńy ǵana jataqhanamen qamtamasyz etilgen. Bul keminde 20 myń stýdenttiń turǵyn úi máselesi sheshilmegenin kórsetedi.
Sonymen qatar, Joǵary aýditorlyq palatanyń esebinde «Qarjy ortalyǵy» AQ derekterine súiene otyryp, jataqhana oryndarynyń tapshylyǵy 33 myń orynǵa jetetini aitylǵan.
"Stýdentterdi jataqhanamen qamtamasyz etý – bilim berý salasynyń ǵana emes, memlekettik jastar saiasatynyń, óńirlik damýdyń jáne eńbek naryǵynyń mańyzdy máselesi. Aita ketý kerek, sońǵy jyldary bul baǵytta birshama jumystar da atqaryldy, jańa jataqhanalar salyndy, oryn tapshylyǵy qysqardy.
Ǵylym jáne joǵary bilim ministrligi de, joǵary oqý oryndary da jaǵdaidy jaqsartýǵa múddeli jáne tiisti jumystar júrgizýde. Alaida máseleni túbegeili sheshý úshin Úkimet deńgeiinde ońtaily úilestirý, turaqty baqylaý jáne birneshe memlekettik organnyń kúshin biriktiretin júieli tásil qajet dep sanaimyz, – dep otyr Nurgúl Taý.
Osyǵan bailanysty depýtat Úkimetke birqatar usynys engizdi. Atap aitqanda, stýdenttik turǵyn úidiń biryńǵai ulttyq tsifrlyq platformasyn qurý, joǵary oqý oryndarynyń tiimdiligin baǵalaý júiesine stýdentterdi turǵyn úimen qamtamasyz etý kórsetkishin engizý, jataqhana qurylysyna investitsiia salatyn oqý oryndary men investorlarǵa yntalandyrý tetikterin qarastyrý usynyldy.
Sondai-aq memlekettik-jekeshelik áriptestik mehanizmderiniń tiimdiligin taldaý, ákimdikterdiń jumysyn baǵalaý kórsetkishterine stýdenttik jataqhana qurylysyna jer bólý máselesin engizý, stýdenttik turǵyn úidi jeke investitsiialyq baǵyt retinde damytýǵa arnalǵan quqyqtyq bazany jetildirý máseleleri kóterildi.
Budan bólek, depýtat stýdenttik jataqhanalardyń qaýipsizdigi men ómir súrý sapasyna qatysty biryńǵai ulttyq standarttar ázirlep, olardyń saqtalýyn turaqty baqylaý tetigin engizýdi usyndy.
"Stýdenttik jataqhana máselesi – strategiialyq mańyzy bar másele. Usynylǵan sharalar revoliýtsiialyq ózgeristerdi qajet etpeidi, olar saiasi erik pen tiimdi úilestirýdi talap etedi", – delingen depýtattyq saýalda.
Májilis depýtaty Úkimetten atalǵan másele boiynsha múddeli memlekettik organdardyń qatysýymen ázirlenetin keshendi jospar men qabyldanatyn naqty sharalar týraly jaýap berýdi surady.
