Frantsiianyń Jer departamentindegi Florans qalashyǵynda joǵalyp ketken 11 jastaǵy Liannanyń máiiti bir aptadan keiin týǵan qalasyna jaqyn jerden tabyldy. Qyzdyń joǵalýyna qatysty tergeý barysynda anyqtalǵan jaittar eldiń Ádilet ministrin de shoshytqan, dep habarlaidy ult.kz.
Lianna ótken juma kúni joǵalyp ketken. Onyń denesi beisenbi kúni tabylǵan.
Qyzdy sońǵy ret kolledjden shyqqan kezde qurbysynyń ákesimen birge kórgen. Kýágerlerdiń aitýynsha, ol 41 jastaǵy Jerom Barellanyń kóligine otyrǵan. Osydan keiin qyzdan habar bolmaǵan.
Liannany ótken jumadan beri jandarmeriianyń kúsheitilgen jasaqtary, jergilikti turǵyndardan quralǵan eriktiler, balyqshylar, ańshylar jáne at sporty klýbynyń músheleri izdegen.
Kún ótken saiyn qyzdy tiri tabýǵa degen úmit azaiyp, 41 jastaǵy Jerom Barellaǵa qatysty kúdik kúsheie tústi.
Kúdikti ustalyp, onyń kóligi saraptama júrgizý úshin tárkilendi.
Tergeýshiler onyń ótken ómirin tekserý barysynda basqa balalardyń ata-analary tarapynan seksýaldyq sipattaǵy zorlyq-zombylyqqa qatysty keminde eki shaǵym túskenin anyqtaǵan. Sonymen qatar, quzyrly organdarǵa eki ret eskertý habarlamasy joldanǵan. Alaida bul málimetterge tiisti deńgeide nazar aýdarylmaǵan, al kúdikti birde-bir ret jaýap alýǵa shaqyrylmaǵan.
Frantsiianyń Ádilet ministri Jerald Darmanen bul iske bailanysty «qatty shoshyǵanyn» málimdedi. Onyń pikirinshe, quqyq qorǵaý jáne sot júiesinde eleýli olqylyqtarǵa jol berilgen.
Ministr ásirese isterdiń túrli prokýratýralar arasynda baiaý berilgenin jáne Jerom Barellaǵa qatysty burynǵy ister boiynsha tergeýdiń tym uzaqqa sozylǵanyn synǵa aldy. Ol osy jaǵdailarǵa bailanysty bastalǵan ákimshilik tekserýdiń qorytyndysy jariialanatynyn aitty.
Tergeý derekterine sáikes, 2017 jyldyń jeltoqsanynda 17 jastaǵy qyzdyń Barellamen qarym-qatynasta bolǵany týraly habar túsken. Alaida 2018 jyly qyzdyń bári óz kelisimimen bolǵanyn aitýyna bailanysty is jabylǵan.
2022 jyldyń qańtarynda Jerom Barellaǵa qarsy taǵy bir shaǵym túsip, onda ol 2020 jyly 15 jastaǵy jasóspirimdi zorlady dep aiyptalǵan. Is óńirlik prokýratýraǵa berilgenimen, 2024 jyly dálelderdiń jetkiliksizdigine bailanysty toqtatylǵan.
Budan bólek, 2025 jyldyń 22 tamyzynda 2014 jyly týǵan qyzdyń anasy Barellany óz balasyn 2024 jyldyń qyrkúiegi men 2025 jyldyń mamyry aralyǵynda birneshe ret zorlady dep aiyptaǵan. Bul týraly prokýror málimdedi.
Al Frantsiianyń Ishki ister ministri Loran Nýnes parlamentte sóilegen sózinde atalǵan isterdiń qalai qaralǵanyn jan-jaqty tekserý úshin Ádilet ministrliginen arnaiy tergeý júrgizýdi suraǵanyn aitty.
