Tehastyq Ted Krýz bastaǵan Respýblikalyq partiianyń 11 senatory keler aptada Kongreste Djo Baidendi AQSh prezidenti bolyp sailandy dep jariialaityn resmi sharaǵa qarsylyq bildiretinin málimdedi.
Sarapshylar bul bastamanyń tek simvoldyq mánge ie ekenin jáne Djo Baidenniń 20 qańtarda prezident qyzmetine kirisýine esh kedergi jasai almaitynyn aitady.
2 qańtardaǵy málimdemesinde 11 senator "2020 jylǵy sailaýdaǵy burmalaý men zań buzý týraly málimet óte kóp boldy" deidi, biraq bul málimdemelerine laiyqty dálel keltirmeidi.
Prezident Donald Tramp byltyr qarashada ótken sailaýda jeńilgenin moiyndamai, daýystardyń burmalanǵanyn aityp, sailaý nátijelerin joqqa shyǵartýǵa talpynyp keledi.
Respýblikalyq partiiadan sailanǵan bir top senator 6 qańtarda Kongress Baidenniń jeńisin resmi túrde jariialaýǵa jinalǵanda sailaý nátijesin qaita qaraý úshin "10 kúndik tótenshe tekseris" júrgizetin arnaiy komissiia qurýdy talap etpek.
Kongrestiń birleken otyrysynda ókilder palatasynyń 140-qa jýyq múshesi de sailaý nátijesine qarsylyq bildirýi múmkin degen boljam bar.
AQSh sailaýshylar alqasy 2020 jylǵy 14 jeltoqsanda Baidenniń jeńisin resmi túrde jariialaǵan. Demokrat Baiden sailaýshylar alqasynyń 306 daýsyn, al respýblikashyl Donald Tramp 232 daýsyn alǵan.
Baidenniń resmi ókili Maikl Gvin bul áreketti saiasi spektakl dep synady.
"Bul áreket sailanǵan prezident Baidenniń 20 qańtarda ant berýine esh kedergi jasai almaidy, sebebi bul negizsiz aiyptardy Tramptyń ózi taǵaiyndaǵan bas prokýror da, ondaǵan sot ta, eki partiianyń sailaýǵa jaýapty adamdary da qarap, joqqa shyǵarǵan" dedi ol.
AQSh-tyń sailaý júiesi boiynsha, halyq aldymen óz atynan tańdaý jasaityn sailaýshylar alqasynyń múshelerine daýys beredi, al olar jalpyulttyq sailaýdan birneshe apta ótken soń formaldy túrde AQSh prezidentin anyqtaidy.
Respýblikalyq partiianyń senatorlary sailaý nátijelerin qaita qaraýdy qajet etetin "daýly shtattardan" kelgen sailaýshylar alqasy múshelerin moiyndamaitynyn aitady.
Kongress olar qoiǵan talaptardy oryndaýy neǵaibyl.
AQSh kongresinde sailaý nátijesine qarsy shyǵý usynysy Respýblikalyq partiianyń ózin ekige jaryp otyr. Senattaǵy kópshiliktiń basshysy Mitch Makkonell partiiaǵa kirmeitin sailaý komissiialarynyń ókilderi "ádil de taza ótti" dep baǵalaǵan sailaýǵa kúmán keltirmeýge shaqyrdy.
Apta basynda Respýblikalyq partiia atynan Nebraskadan sailanǵan senator Ben Sasse partiialastaryn eldiń azamattyq normalaryna qaýip tóndiretin bul "qaterli bastamadan" bas tartýǵa shaqyrǵan.
