videodan alynǵan kadr
Qylmystyq top messendjer arqyly Astana, Kókshetaý jáne Qaraǵandyda esirtki ótkizý arnasyn jolǵa qoiǵan, - dep habarlaidy "Ult aqparat" Polisia.kz saityna silteme jasap.
Uiymdasqan qylmystyq toptyń múshelerin politseiler sáýirde "Suńqar" jáne jyldam qimyldaityn arnaiy jasaq bólimshelerimen birlesip quryqtaǵan.
"Úsh qalada 11 qylmysker ustalyp, toǵyz mekenjai boiynsha qyzmettik-izdestirý itterin tarta otyryp tintý júrgizildi. Tergeý barysynda uiymdasqan qylmystyq toptyń árbir qatysýshysy esirtkini býyp-túiý, saqtaý, tasymaldaý nemese taratý, toptyń aqshalai kiristeri men shyǵyndaryn baqylaý siiaqty naqty rólderdi oryndaǵany dáleldendi.
Osylaisha, qylmyskerlerdiń biri qylmystyq biznespen qamtylǵan qalalar boiynsha esirtkiniń asa iri partiialaryn saqtaýǵa jáne tasymaldaýǵa jaýapty boldy. Al ekinshisi qarjylyq kirister men shyǵyndardy baqylaý úshin toptyń múshelerine "jalaqy" tóleýmen, "joǵalǵan" esirtkiler úshin aiyppuldar salýmen ainalysqan", - delingen habarlamada.
Qylmystyq top músheleriniń biri esirtki satylatyn internet-arnalardyń jumysyn qamtamasyz etken. Sondai-aq ol jańa klientterdi belsendi túrde tartýmen ainalysyp, onlain-konkýrstar, utys oiyndary men aktsiialar ótkizgen.
Top músheleriniń biri kámeletke tolmaǵan, kolledjdiń ekinshi kýrs stýdenti ekenin aita ketken jón.
"Zańsyz ainalymnan úsh keli esirtki tárkilendi. Qylmystyq iske zattai dálel retinde ulttyq jáne shetel valiýtasyndaǵy qarajat, qylmystyq árkette paidalanylǵan uialy telefondar, noýtbýkter, sim-kartalar qosa tirkeldi", - delingen habarlamada.
Sonymen qatar esirtki satatyn úsh internet-dúkenniń jumysy toqtatylǵan.
"Uiymdastyrýshyǵa jáne esirtki biznesine qatysýshylarǵa asa iri mólsherde esirtkiniń zańsyz ainalymynan basqa QR QK-niń 262-shi "Uiymdasqan topty qurý, oǵan basshylyq etý jáne qatysý" baby boiynsha aiyp taǵylyp otyr. Múlki tárkilenip, on eki jylǵa deiin bas bostandyǵynan aiyrý jazasy kózdeledi", – dedi QR IIM esirtki qylmysyna qarsy is-qimyl departamenti bastyǵynyń orynbasary Asqar Muhametqaliev.
video: Polisia.kz
