«Habar» telearnasyna bergen suhbatynda QR Tuńǵysh Prezidenti Nursultan Nazarbaev 30 jyl tabysty eńbek etýiniń syrymen bólisti, dep habarlaidy "Ult aqparat".
Suhbat barysynda tilshiler Elbasydan 30 jyldyq tabysty eńbek etýiniń syryn aitýyn ótingen edi.
«Ol týraly kóp jazyldy, kóp aityldy. Áneýgúni, jazda basshylyq qyzmettegi laýazymymnyń 30 jyldyǵyn atap ótken konferentsiiada azamattar sóilep, qandai jaǵdaida boldyq, ne istedik degen máselelerdi talqyladyq. Shet jaǵasyn aityp kettim, eldiń senimin arqalap osy jyldardyń ishinde meniń seriktesterimmen, zamandastarymmen birge 100 jylǵa tatityn sharýany atqardyq. Onyń bári elge málim. Ál-aýqat úshin ekonomika kerek qoi. Ekonomika óspese, ekonomikanyń ósip-órkendeýi bolmasa, memlekettiń qaltasynda qarjy bolmaidy. Al qarjy bolmasa, zeinetaqyny da, jalaqyny da tólei almaidy», - dedi Elbasy.
QR Tuńǵysh Prezidenti osy jyldardyń ishinde el ekonomikasy 20 ese óskenin, 2 myńǵa jýyq aýrýhana men emhana, 1500-den astam mektep, 1 myńǵa tarta balabaqsha salynǵanyn eske saldy.
«Osynyń barlyǵy halyqtyń jaǵdaiy, ál-aýqaty. Osyndai qamqorlyqtyń arqasynda, eldiń tabysynyń artýynyń arqasynda biz ortasha jasty 67-ten 73 jasqa asyrdyq. Buiyrtsa, odan da joǵarylap, 80 jasqa jetedi dep oilaimyz. Ol bizde qashan bolyp edi? Eshqashan bolǵan joq. Halyqtyń sany ózgerdi. Mysaly 1991 jyly men Táýelsizdikti jariialar kezde Joǵarǵy keńestiń depýtattarynyń ishinde qazaqtyń sany 44 paiyz bolatyn, Qazaqstanda da solai edi. Qazir Qazaqstanda qazaq sany 70 paiyzǵa jetip qaldy. Ol biz úshin úlken tabys. Keńes odaǵy qulady, el ne isterin bilmei qaldy. "Osy jerde bolamyz ba, bolmaimyz ba", "qazaq tilin bilmeitinderdiń bolashaǵy joq eken" dep jan-jaqqa kóshken kezde halqymyzdyń sany 14 millionǵa tómendep ketti. Qazir, mine, Qudaiǵa shúkir, 18 millionnan asyp jyǵylamyz. 18 mln 200 myń halqymyz bar. Onyń ishinde 70 paiyzy ózimizdiń qazaq», - dedi N.Nazarbaev.
.jpeg)