Ulttyq aýdarma biýrosy 100 jańa oqýlyqty aýdarý jobasy aiasynda biyl 30 kitapty qazaq tilinde sóiletpek. Bul jumystarǵa 300-den asa ǵalym men aýdarmashy-redaktor jumyldyrylǵan, dep habarlaidy QazAqparat tilshisi.
Búgin Almatydaǵy ortalyq kommýnikatsiialar qyzmetinde osy jobaǵa bailanysty baspasóz brifingi ótip, onda jýrnalisterge qosymsha aýdarylyp, basylyp shyqqan eki kitap tanystyryldy.
Tarihshy Iýval Noi Harraridiń "Sapiens: adamzattyń qysqasha tarihy" kitaby men Stiven Kovidiń "Jasampaz adamnyń 7 daǵdysy" atty eńbegi qazaq aýditoriiasyna jol tartty.
"Búgin kitaptardyń kópshilikke jol tartýyn asyǵa kútken kún. Bular - eń úlken qalalardaǵy eń úlken dúkenderde satylatyn, eń úlken tirajben basylyp taraǵan kitaptar. Buǵan deiin qazaq tilinde mundai bestseller bolmaǵan. Biyl joba aiasynda álemdik bestseller sanalatyn 30 kitap iriktelip alyndy. Tizimdi bizdiń saittan kórýge bolady. Qazir osy baǵytta jumys jasalyp jatyr. Negizinen bir kitapty aýdarýǵa 6-7 ai ýaqyt ketedi. Ol aýdarma, ǵylymi redaktsiia, ádebi redaktsiia, qattaý, betteý, baspa siiaqty kezeńder. Shyndyǵynda, ár aýdarma - bir týyndy jazýmen para-par",- dedi Ulttyq aýdarma biýrosynyń atqarýshy direktory Raýan Kenjehanuly.
Onyń aitýynsha, qazir filosofiia, áleýmettaný, psihologiia, mádeniettaný, dintaný, til bilimi, ekonomika, menedjment pen kásipkerlik salalary boiynsha álemniń úzdik oqý oryndarynyń qoldanysyndaǵy eń tanymal oqýlyqtar qazaq tiline aýdarylyp jatyr.
Qalalyq Ishki saiasat basqarmasynyń basshysy Nurlan Sydyqovtyń aitýynsha, joba aiasynda kitaptardyń aýdio nusqasy jaryq kóredi.
"Eger bul kitaptardyń tarihyna úńiletin bolsańyzdar, ózderińiz jaqsy biletindei "Jasampaz jandardyń jeti daǵdysy" álemniń 40 tiline aýdarylyp 30 millionnan astam danamen jaryqqa shyqqan kitap. Al endi búgin bul kitaptar qazaq tiline aýdarylyp joǵaryda aitqandai jalpy aýditoriiaǵa qoljetimdi bolyp jatyr. Rýhani jańǵyrý baǵdarlamasynda kórsetilgen negizgi qundylyqtar bar - ol sananyń ashyqtyǵy, bilimge degen qushtarlyq, pragmatizm máselesi. Bizdiń oiymyzsha osyndai qosymsha kitaptar arqyly, qosymsha bilim arqyly bul máseleler qamtylatyn bolady. Sonymen qatar bul álemdik bestsellerdiń endi aýdio nusqasy, elektrondy nusqasy shyǵatyn boldy", - dedi Nurlan Sydyqov.
Mamandardyń aitýynsha, kitaptyń 1 betin aýdarý úshin 7 myń teńge jumsalady. Orta eseppen 1 kitapty aýdarýǵa 30 mln teńge shamasynda qarjy ketedi.
Aita keteiik, Qazaqstan Prezidenti Nursultan Nazarbaevtiń «Rýhani jańǵyrý» baǵdarlamasy aiasyndaǵy «Jańa gýmanitarlyq bilim. Qazaq tilindegi 100 jańa oqýlyq» jobasyn júzege asyrý úshin Ulttyq aýdarma biýrosy qurylǵan bolatyn.
Atalǵan biýro byltyr 18 kitapty qazaq tiline aýdardy. Bul oqý quraldary 10 000 taralymmen 110 joǵary oqý oryndaryna taratylǵan edi.
Joba bastalǵaly beri Ulttyq aýdarma biýrosy Kembridj, Oksford ýniversitetteriniń baspalary men Cengage, Pearson, Penguin Random House, Mcmillan sekildi halyqaralyq baspa úilerimen tyǵyz áriptestik bailanys ornatty.
