Osydan bir jarym jyl buryn Reseide 48 adamdy órtten qutqarǵan Semei qalasynyń turǵyny Erjan Omarhanov «Qazaqstannyń 100 jańa esimi» jobasynyń úshinshi kezeńinde jeńimpaz atandy, dep habarlaidy QazAqparat.
Ótken jyldyń tamyz aiynda tirkelgen oqshaý oqiǵany sol tusta qazaqstandyq jáne reseilik BAQ ókilderi men áleýmettik jeli qoldanýshylary jarysa jazǵan edi. 28 jastaǵy Erjan kólik satyp alý úshin «Semei - Novosibir» baǵytyndaǵy avtobýspen jolǵa shyqqan. Biraq túngi saǵat úshke taiaý Aleisk qalasynyń tusynda avtobýstan órt shyqqan. Bul ýaqytta jolaýshylardyń barlyǵy tynysh uiqyda jatqan eken. Órt tutanǵanyn tek Erjan ǵana baiqapty. Ol birden júrgizýshige avtobýsta órt shyqqanyn habarlap, kólikti toqtatqansha jolaýshylardyń birazy tútinge ýlanyp úlgergen. Erjan osylaisha, ashylmaǵan esikti teýip ashyp, sanaýly sekýnd ishinde baladan qarttarǵa deiin bárin syrtqa alyp shyqqan. Avtobýs tolyǵymen janyp ketken.
«Qazir oilanyp otyrsam, bala kezden sportpen ainalysqanymnyń arqasynda sol tusta adamdardy qutqara aldym dep oilaimyn. Bapkerlerimiz adamdarǵa kómektesińder, muqtajǵa qol ushyn sozyńdar dep úiretti. Sporttyń arqasynda aman qaldyq», - dedi Erjan Amarhanov elordada «Qazaqstannyń 100 jańa esimi» jobasynyń úshinshi kezeńine orai ótkizilgen jiynnan keiin.
Sol kezde aman qalǵan jolaýshylar áli kúnge deiin Erjanǵa habarlasyp, jaǵdaiyn bilip turady eken. Erlik eskerýsiz qalǵan joq. «Lankaster» atty almatylyq kompaniianyń basshylary Erjanǵa Semei qalasynan úi alyp beripti. Al Semei qalasynyń ákimi Ermak Sálimov 1 million teńge tabys etken.
Erjan qazirgi tańda Semeide balalardy kúreske baýlidy. Qaiyrymdylyqpen de ainalysady. Jaqynda qala shetinde jalǵyz turatyn 90 jastaǵy ájeni qamqorlyǵyna alyp, Facebook arqyly kómekke qarjy jinaǵan.
Eske sala ketsek, elordada «Qazaqstannyń 100 jańa esimi» jobasynyń úshinshi kezeńi ótti. «Qazaqstannyń jańa esimderi» jobasynyń maqsaty - táýelsizdik jyldary Qazaqstannyń damýyna eleýli úles qosqan adamdardyń tarihy mysalynda tabystylyq, básekege qabilettilik, pragmatizm jáne bilimge tabyný ideialaryn ilgeriletý.
Biyl jobaǵa qatysý úshin 1673 anketa qabyldanǵan. Jalpy, barlyq qatysýshyǵa 700 myńnan asa daýys berilgen. Barlyq kezeńniń qorytyndysy boiynsha biyl 32 jeńimpaz anyqtaldy.
.jpeg)