Qazaqstandyq Ánýar (esimi ózgertildi - avt. esk.) búgin túnde 10 saǵat boiy Qazaqstan - Resei shekarasynda kezekte turǵan. Ol túnde shekarada qandai jaǵdai bolǵanyn aityp berdi, dep habarlaidy Massaget.kz.
Ánýar evakýator júrgizedi. Ol bir apta buryn Reseige jumys babymen barǵan. Al keshe kóligimen Qazaqstanǵa qarai jolǵa shyǵypty.
"Túngi 02:00-de shekara mańynda kepteliske tap boldyq. Shekaradan ótpek bolyp turǵan kólik óte kóp eken. Jeńil kólikpen júrgen keibir reseilik keptelisti ainalyp, shekaradan jyldam ótip ketkisi keldi. Saldarynan kezek buzylyp, baibalam bolyp ketti. Sol kezde júk kóligimen júrgen qazaqstandyqtar olardy toqtatyp, keptelisti rettedi. Keiin politseiler kelip, bári kezekke turdy", - deidi ol.
Onyń aitýynsha, kepteliste turǵysy kelmei asyqqandar kóligin tastap ketken eken.
"Reseilikter kepteliste kóligin tastap, sómkelerin, kerek zattaryn alyp, jaiaý ketip jatyr. Joldan biz siiaqty evakýatorlardan "qansha aqsha surasań da tóleimin, kóligimdi jetkizip bershi" dep surady. Biraq evakýatorlar bas tartyp jatyr, sebebi artqa qaityp, kólikti alyp, kepteliste qaita turǵysy kelmeidi", - deidi Ánýar.
Ol sómkemen jaiaý ketip bara jatqandardyń deni jastar ekenin aitady.
Qazaqstandyqtyń aitýynsha, keptelis birneshe shaqyrymǵa sozylyp jatyr. Ol "shamamen 10 shaqyrymnan asady" deidi.
Kólik kóp bolǵany sonsha Ánýar tańdy kezekpen atyrǵanyn aitady. 10 saǵat shekarada kútipti.
"Shekaraǵa túngi 2-de jetken edim, búgin túski 12-de ǵana Qazaqstan shekarasynan óttim", - deidi ol.
Buǵan deiin Reseiden Qazaqstanǵa kóship kelýshiler sanynyń kóbeiýine bailanysty IIM málimdeme jasaǵan. Onda biyl elge 1 million 660 myń reseilik kelse, onyń 1 million 640 myńy elden ketip qalǵany aitylǵan.
Al Syrtqy ister ministrligi qazaqstandyqtardy ózindik danalyǵyn kórsetip, qonaqjailyq dástúrine berik bolýǵa shaqyrǵan edi.
