Aqtóbede politsiia internet-alaiaqtardyń qylmystyq kirisin qolma-qol aqshaǵa ainaldyrý úshin bank kartalaryn zańsyz ainalymǵa engizgen kúdiktini ustady, dep habarlaidy ult.kz.
Polisia.kz jazýynsha, tergeý málimetinshe, kúdikti 18–25 jas aralyǵyndaǵy jastardan bank kartalaryn 20–30 myń teńgege satyp alyp, keiin olardy úshinshi tulǵalarǵa satyp otyrǵan. Bul kartalar alaiaqtyq jolmen alynǵan qarajatty qolma-qol aqshaǵa ainaldyrý úshin paidalanylǵan.
Aldyn ala esep boiynsha, atalǵan kartalar arqyly shamamen 10 million teńge zańsyz ainalymǵa jiberilgen. Kúdikti ýaqytsha ustaý izoliatoryna qamaldy, tergeý jalǵasyp jatyr.
Jyl basynan beri Aqtóbe oblysynda internet-alaiaqtyqqa qatysy bar 60-tan astam dropper anyqtalǵan. Politsiia bank kartalary men shot derekterin bógde adamdarǵa bermeýge shaqyrdy.
