Indoneziia sońǵy 15 jyl ishinde topyraq qabatynyń shógýi jáne teńiz deńgeiiniń kóterilýine bailanysty, qurlyqtaǵy 29 myń gektardai jerinen aiyryldy.
Bul Djakartanyń aýdanymen para-par. Bul jaily The Jakarta Post gazeti jazdy, dep habarlaidy "Ult aqparat".
Eldiń Teńiz isteri jáne balyq sharýashylyǵy ministrliginiń derekterine qaraǵanda, Iava aralyndaǵy jaǵdai qatty alańdatady. Araldyń soltústik jaǵalaýyndaǵy jer kúshti eroziiaǵa ushyraǵan.
Buǵan teńizdiń qýatty tolqyndary, sonymen qatar jergilikti turǵyndardyń sharýashylyq qyzmeti de áser etip otyr. Kesilgen ormandar men plantatsiialardyń orny jyldam eroziiaǵa ushyrap barady.
Sarapshylardyń aitýynsha, Djakartada topyraq qabaty jylyna 10-25 sm shógedi. Bilikti alańdatatyn taǵy bir jait, qala aýmaǵynyń 40%-ǵa jýyǵy onsyz da teńiz deńgeiinen tómen ornalasqan. Eger jaǵdai ońalmasa, 2030 jylǵa qarai Djakarta tolyqtai sý astynda qalýy múmkin.
Qazirgi tańda Djakartada on millionǵa jýyq halyq turady.
