Tanymal akter Asqar Jumabekov basyna is túskenin aityp, el Prezidentinen kómek surady. Onyń sózinshe, qaltalylardyń kesirinen jazyqsyz bir top jigit sottalyp ketpek. Bul týraly ol óziniń Instagram paraqshasynda málimdedi, dep habarlaidy Azattyq Ruhy.
Oqiǵa byltyr 27 jeltoqsanda Almatydaǵy ál-Farabi dańǵylyndaǵy karaokelerdiń birinde bolǵan. Jas ártistiń aitýynsha, atalǵan jerde aýqatty áýlettiń uldary jaǵa jyrtysqan. Al Asqar Jumabekov tóbelesken jigitterge arasha túsken.
«Qazaqstan Respýblikasynyń azamaty retinde, qurmetti Prezident, Sizden ótinip, kómek suraǵym kelip tur. Myna videony túsirýge májbúr bolyp turmyn. Sebebi basymda bir is bolyp jatyr. Qurmetti sot, ózim halyqtyń aldynda júrgen adammyn, óner adamymyn, aktermin. Sol sebepti osy video sizge jetedi degen úmittemin», - dedi ol.
Onyń aitýynsha, jaqynda sot úkim shyǵady. Al ózi 10 aidan beri úiqamaqta otyr.
«Men myna videony ózimdi qorǵaý maqsatynda, sizden kómek suraý maqsatynda túsirip qoiyp jatyrmyn. Ádildikti qalaimyn. Ol jerde meniń eshqandai kinám joq. Men ajyrattym. Eshkimmen tóbelesken joqpyn, qurmetti Prezident. Eger de erteń bizdi bas bostandyǵymyzdan aiyratyndai jaǵdai bolyp jatsa, osy video búkil Instagram jelisinde tarasa eken deimin. Ol jerde aýqatty kisilerdiń uldary bolǵan. Sol sebepti kimge baryp kómek surasań da, basyn alyp qashady. Sebebi qorqady. Myna videony ózim túsirip otyrmyn. Óitkeni basqa múmkindik qalmady, qurmetti Prezident. Barynsha kómek berýińizdi ótinip suraimyn Sizden», - dedi akter.
Asqar Jumabekovtiń aitýynsha, bul is boiynsha ózge de jigitter de jazyqsyz sottalǵaly jatyr. Alaida akter olardyń kim ekenin aitpaǵan.
«Biz qai elde turyp jatyrmyz? Bizde aqsha joq bolsa, biz sonda bárimiz qamala berýimiz kerek pe? Eger sondai bolsa, onda biz Qazaqstan eliniń azamaty bolmai-aq qoiaiyq», - dedi ol.
