Biryńǵai jinaqtaýshy zeinetaqy qory 1 sáýirden bastap birjolǵy zeinetaqy tólemderi qalai júzege asyrylatynyn túsindirdi, dep habarlaidy QazAqparat.
Biyl 1 sáýirden bastap 2022 jylǵa eseptelgen zeinetaqy jinaqtarynyń eń tómengi jetkiliktilik shegi kúshine enedi. Buǵan deiin Prezident Qasym-Jomart Toqaevtyń tapsyrmasyn oryndaý úshin QR Úkimetiniń 2021 jylǵy 13 jeltoqsandaǵy №875 qaýlysymen 2021 jylǵa eseptelgen tómengi jetkiliktilik shegin qoldaný merzimi 2022 jyldyń 1 sáýirine deiin uzartyldy.
«Zeinetaqy jinaqtarynyń bir bóligin paidalaný quqyǵyn iske asyrý úshin salymshy turǵyn úi jaǵdaiyn jaqsartý jáne (nemese) emdelýge aqy tóleý maqsatynda alýǵa qoljetimdi zeinetaqy jinaqtarynyń bar-joǵyna kóz jetkizýi tiis. Muny enpf.kz saity nemese BJZQ mobildi qosymshasyndaǵy jeke kabinetten jáne egov portaly men mobildi qosymshasynan kórýge bolady. Odan ári salymshy zeinetaqy jinaqtarynyń bir bóligin paidalaný týraly sheshim qabyldaǵan jaǵdaida, ýákiletti operatorlardyń internet-resýrsy arqyly aldyn ala ótinish bergeni jón. Búginde turǵyn úi jaǵdaiyn jaqsartýǵa arnalǵan birjolǵy zeinetaqy tólemderine ótinishter qabyldaityn ýákiletti operatorlar: «Otbasy bank» turǵyn úi qurylys jinaq banki» AQ, «Qazaqstan Halyq banki» AQ, «Altyn Bank» AQ, «Bank TsentrKredit» AQ jáne «Bank Fridom Finans Qazaqstan» AQ, emdelýge «Otbasy bank» turǵyn úi qurylys jinaq banki» AQ bolyp otyr», - dep jazylǵan BJZQ habarlamasynda.
Ýákiletti operator birjolǵy zeinetaqy tólemin alý týraly ótinishti qaraǵannan keiin 2 jumys kúninde BJZQ-ǵa elektrondy habarlama jiberedi. BJZQ tarapynan alýǵa qoljetimdi qarajat tekseriledi, munda ýákiletti operatordan elektrondy habarlama kelip túsken kúngi tómengi jetkiliktilik shegi eskeriledi. BJZQ elektrondy habarlama kelip túsken kúnnen bastap, bes jumys kúni ishinde ýákiletti operatorǵa alýshynyń arnaiy shotyna birjolǵy zeinetaqy tólemin aýdarady.
Nazar aýdararlyq jait – 2022 jylǵa arnalǵan tómengi jetkiliktilik shegi 2022 jyldyń 1 sáýirinen bastap kúshine enetindikten, BJZQ ýákiletti operatorlardan BJZQ-ǵa 2022 jyldyń 31 naýryzyna deiin kelip túsken ótinishter boiynsha 2021 jylǵa eseptelgen tómengi jetkiliktilik shegine sáikes birjolǵy zeinetaqy tólemderin júrgizedi.
«Qazaqstan Respýblikasynda zeinetaqymen qamsyzdandyrý týraly» Zańda tómengi jetkiliktilik shegi – QR Úkimeti bekitken ádistemege sáikes aiqyndalǵan mindetti zeinetaqy jarnalary jáne mindetti kásiptik zeinetaqy jarnalary esebinen qalyptastyrylǵan zeinetaqy jinaqtarynyń eń tómengi mólsheri dep aiqyndalǵan. Tómengi jetkiliktilik shekti aiqyndaý ádistemesi QR Úkimetiniń 2013 jylǵy 2 qazandaǵy №1042 qaýlysymen (2021 jylǵy 6 qańtardaǵy ózgeristeri men tolyqtyrýlarymen) bekitilgen.
Ádistemege sáikes, tómengi jetkiliktilik shek mólsheri jyl saiyn ár jas úshin esepteledi jáne bolashaq zeinetaqy tólemderi men zeinetaqy jarnalarynyń ósýin (indekstelýin) eskeredi. Bul rette QR «Respýblikalyq biýdjet týraly» Zańyna sáikes, jyl saiyn indeksteletin eń tómengi jalaqy, eń tómengi zeinetaqy, bazalyq zeinetaqy tóleminiń eń tómengi mólsheri siiaqty áleýmettik kórsetkishter paidalanylady.
Eske sala keteiik, Biryńǵai jinaqtaýshy zeinetaqy qorynyń málimetinshe, 2021 jyldyń qańtary men osy jyldyń 1 naýryzy aralyǵynda 967 853 qazaqstandyq zeinetaqy jinaǵynyń shekti mólsherden asatyn somasyn úi jaǵdaiyn jaqsartýǵa alý úshin ótinim berdi. Olarǵa qordan 2,7 trln teńge qarjy aýdaryldy.
Bul rette birjolǵy zeinetaqy tólemderiniń ortasha somasy 3,1 mln teńge boldy. Zeinetaqy jinaǵyn alǵandardyń basym kópshiligi Almaty, Nur-Sultan qalalarynyń jáne Mańǵystaý oblysynyń turǵyndary.
