2021 jyldyń qańtarynan osy ýaqytqa deiin 1 millionnan astam qazaqstandyq zeinetaqy jinaqtaryna baspana aldy, emdelýge jumsap, ózge qarjy institýttaryna senimgerlik basqarýǵa berdi, dep habarlaidy QazAqparat.
Biryńǵai jinaqtaýshy zeinetaqy qorynyń málimetinshe, 2021 jyldyń qańtary men osy jyldyń 1 naýryzy aralyǵynda 967 853 qazaqstandyq zeinetaqy jinaǵynyń shekti mólsherden asatyn somasyn úi jaǵdaiyn jaqsartýǵa alý úshin ótinim berdi. Olarǵa qordan 2,7 trln teńge qarjy aýdaryldy. Bul rette birjolǵy zeinetaqy tólemderiniń ortasha somasy 3,1 mln teńge boldy. Zeinetaqy jinaǵyn alǵandardyń basym kópshiligi Almaty, Nur-Sultan qalalarynyń jáne Mańǵystaý oblysynyń turǵyndary.
Aita keterligi, ýákiletti operatorlardan salymshylardyń (alýshylardyń) jeke zeinetaqy shottaryna ótinish berýshiniń ótinishi jáne ózge de sebeptermen 379,9 mlrd teńgeden asa qarajat qaitaryldy. Sebebi, qazaqstandyqtar birjolǵy zeinetaqy tólemderin belgilengen merzimde paidalanbaǵan.
Sonymen qatar 198 657 azamat zeinetaqy jinaqtaryn emdelýge paidalaný úshinótinim berdi. Jalpy soma 176,4 mlrd teńgeni quraidy. Bul rette alýǵa bolatyn ortasha soma – shamamen 0,9 mln teńge. Biraq, ótinish berýshiniń ótinishi nemese ózge de sebeptermen belgilengen merzimde paidalanylmaǵan 19,9 mlrd teńge salymshylardyń shottaryna qaitaryldy.
BJZQ zeinetaqy aktivterin senimgerlikpen basqarýǵa qatysty tórt investitsiialyq portfeldi basqarýshymen shart jasasqan. Osylaisha salymshylardyń 7,6 mlrd teńgesiniń 45,86% nemese 3,46 mlrd teńgesi «Jusan Invest» AQ-qa, 27,65% nemese 2,09 mlrd teńgesi «Halyk Global Markets» AQ-qa, 15,97% nemese 1,21 mlrd teńgesi «BCC Invest» AQ-qa, 10,53% nemese 0,80 mlrd teńgesi «Sentras Sekiýritiz» AQ-qa aýdaryldy.
