0-synypty oqytýdyń máni men maqsaty - balabaqshalardaǵy daiarlyq toptaryna biryńǵai baǵdarlamalar men oqýlyqtardy engizý. Bul týraly QR Bilim jáne ǵylym ministrliginiń baspasóz qyzmeti málim etti, dep habarlaidy "Ult aqparat".
QR Bilim jáne ǵylym ministrliginiń Mektepke deiingi jáne orta bilim departamentiniń habarlaýynsha, mektepaldy daiarlyq synybyn (0-synyp) engizýdiń máni óte qarapaiym. Basty maqsat - balalardy birinshi synypqa biryńǵai baǵdarlama boiynsha daiyndaý. Onyń ishinde birinshi synyp baǵdarlamasynyń bir bóliginiń (sandar men álipbi) 0-synyp baǵdarlamasyna aýysýy, sondai-aq tárbieshilerdiń dárejesin bastaýysh synyp muǵalimderiniń dárejesine deiin jetkizý. 0-synyp úshin biryńǵai baǵdarlama men oqýlyqtardy engizý 2020 oqý jylynyń qyrkúiegine josparlanyp otyr.
Atap aitqanda, búginde 0-synyp - balabaqshadaǵy daiarlyq toby.
«Eger de mekteptiń óz ǵimaratynda 0-shi synyp uiymdastyrýǵa múmkindigi bolsa, oǵan tolyqtai quqyǵy bar. 0-synypty engizý quqyǵynan balabaqshalardy eshkim aiyrǵan joq. Osylaisha, 2020 jyly elimiz boiynsha barlyq mektepter men balabaqshalarda 0-synyptar ashylady. Alaida qoldanystaǵy Bilim týraly zańnamada balalardy 6 jastan 1-synypqa barýǵa mindetteitin norma bar. Zańnyń atalmysh normasyna ózgeris engiziledi», - delingen ministrlik habarlamasynda.
2019 jyly, iaǵni byltyrǵydai 1 qyrkúiekte tolyq 6 jasqa tolatyn balalar 1-synypqa bara alady. 1 qyrkúiekke deiin 6 jasqa tolmaǵan balalar ata-ananyń qalaýymen mektepke bara alady nemese balabaqshada qalýyna bolady. 7 jasar balalar da birinshi synypqa qabyldanady. «Eger de bala mektepaldy daiarlyq synybynyń baǵdarlamasyn balabaqshada meńgerse, mektepte ony qaita oqi almaityndyǵyn jáne 1-synypqa barýy kerektigin eskerýimiz qajet»,- deidi ministrlik ókilderi.
