Foto: Soltan Jeksenbekov / Kazinform
Ǵani Beisembaev Instagram-daǵy paraqshasynda Bilim kúnimen quttyqtaýyn jetkizip, jańa oqý jylyn biz úlken josparlarmen, úkili úmitpen bastap otyrǵanyn aitty.
— Qurmetti áriptester! Qadirli ustazdar, ata-analar men oqýshylar! Búgin Qazaqstannyń túkpir-túkpirindegi bilim ordalary óz esigin aiqara ashady. Jańa oqý jylyn biz úlken josparlarmen, úkili úmitpen bastap otyrmyz. Sizderdiń árqaisyńyz elimizdiń bolashaǵy úshin ólsheýsiz úles qosyp kelesizder. Biylǵy oqý jyly oqýshylarymyz ben ustazdarymyzdy jańa biikterdi baǵyndyrýǵa shabyttandyratyn jetistikter men jeńisterge toly bolsyn dep tileimin! Bilim kúni qutty bolsyn! — dep jazdy Beisembaev.
Búgin — Bilim kúni. Búgin 360 myń bala mektep tabaldyryǵynan alǵash ret attaidy. Oqý-aǵartý ministri Ǵani Beisembaev 6 tamyzda ótken úkimet otyrysynda osyndai málimet keltirdi.
Ministrdiń aitýynsha, 2025-2026 oqý jylynda elde 7859 mektep balalarǵa bilim bermek. Ǵani Beisembaev onyń ishinde 6387 mekteptiń jaǵdaiy jaqsy ekenin aitqan edi.
Ministrlik bergen keiingi málimet boiynsha 1 qyrkúiekten bastap eldegi 8 myńnan astam mektepte 4,1 mln bala bilim alady. Onyń 360 myńnan astamy birinshi synyp oqýshylary, 232 myńy 11-synyp túlekteri .
Al ákimdikter respýblika boiynsha 1,7 mln balanyń mektepte ystyq tamaqty tegin ishýine qajetti qarajatty der kezinde bólgen. Bul byltyrǵydan 100 myń balaǵa kóp.
Ǵani Beisembaev bul oqý jylynda 510 myń balanyń mektepke daiyndyǵyna ákimdik esebinen qoldaý bolatynyn aitqan.
Al ministrliktiń 29 tamyzdaǵy málimeti boiynsha, «Jalpyǵa birdei bilim berý qory» ata-analar men zańdy ókilderdiń esepshottaryna mektep formasyn, aiaq kiim men oqý-quraldaryn satyp alýǵa 25,3 mlrd teńge aýdarylǵan. Bul ákimdikterdiń tizimindegi 500 myńnan astam oqýshyǵa kómek kórsetildi degen sóz. Biyl bir balaǵa beriletin eń tómengi tólem mólsheri 46 228 teńge bolyp otyr. Al jergilikti máslihattardyń sheshimimen Almaty qalasynda bul soma 55 myń teńge, Jambyl oblysynda 53 117 teńge, Pavlodar oblysynda — 53 663 teńge bolyp belgilengen.
Jańa oqý jylynda el mektepterinde erekshe bilim berý qajettiligi bar balalarǵa arnalǵan 1093 qoldaý kabineti jumys isteidi. Bul kabinetterde psihologtar, arnaiy jáne áleýmettik pedagogter, pedagog-assistentter erekshe balalarǵa qolaily jaǵdai jasap, olardy mektep ortasyna beiimdeýge kómektesedi.
Jańa oqý jyly bastalǵanǵa deiin 163 bilim berý uiymynda jóndeý jumystary aiaqtalyp, 138 myńnan astam oqýshy jańartylǵan jáne tolyqtai qaita jabdyqtalǵan mektepterde bilim alady dep josparlanǵan bolatyn.
Renovatsiia baǵdarlamasy boiynsha 127 mektep jańartyldy. Onda 99 myńǵa jýyq bala bilim alady. Sonymen qatar 1 myńǵa jýyq aýyl mektebinde robototehnika, himiia, biologiia, fizika jáne STEM pánderi boiynsha 1108 zamanaýi kabinet ornatyldy.
2025 jyly balalardy qosymsha bilim berýmen qamtý 3,2 mln baladan 3,4 mln-ǵa deiin ulǵaidy. Olardyń 62%-y tegin úiirmeler men sektsiialarǵa qatysady. Qazir respýblika boiynsha 380 túrli baǵyttaǵy úiirme boiynsha qyzmet kórsetetin 2142 mektepten tys uiym jumys isteidi.
Biyl eldiń 12 óńirinde 22 oqýshylar saraiy salynyp jatyr. Ázirge Soltústik Qazaqstan, Pavlodar oblystary men Almaty, Shymkent qalalarynda nysandar qoldanysqa berildi.
Búkil el aýmaǵynda 267 myń balaǵa arnalǵan 232 mektep salynyp jatyr. Onyń 83 mektebi oqý jylynyń basynda, 111 mektebi oqý jylynyń aiaǵyna deiin salynyp bitý kerek.
«Keleshek mektepteri» ulttyq jobasy aiasynda 460 myń orynǵa arnalǵan 217 jańa formattaǵy mektep salynyp jatyr. Qazir sonyń 130-y ashyldy, olardyń 44%-y aýylda salynǵan.
