Qazaqstandaǵy Otbasynyń tsifrlyq kartasynda 6,2 mln otbasyn quraityn 20,6 mln azamat týraly málimet bar. Júie otbasylardyń áleýmettik-ekonomikalyq jaǵdaiyn baǵalap, memlekettik qoldaý sharalaryn aldyn ala usynýǵa múmkindik beredi, dep habarlaidy ult.kz.
Eńbek jáne halyqty áleýmettik qorǵaý ministrliginiń málimetinshe, Otbasynyń tsifrlyq kartasy 2023 jylǵy 1 qańtardan bastap jumys isteidi. Ol ár otbasynyń tsifrlyq beiinin qalyptastyryp, áleýmettik ál-aýqat deńgeiin anyqtaidy.
Otbasylardyń jaǵdaiy 59 kórsetkish pen 8 negizgi baǵyt boiynsha baǵalanady. Olarǵa mynalar jatady:
- qarjylyq jaǵdaiy;
- múlki men aktivteri;
- turǵyn úi jaǵdaiy;
- jeńil avtokóligi men kommertsiialyq kóliginiń bolýy;
- jer ýchaskesi men jeke qosalqy sharýashylyǵynyń bolýy;
- jumyspen qamtylýy;
- nesieleri men merzimi ótken beresheginiń bolýy;
- kásipkerlikpen ainalysýy jáne basqa da kórsetkishter.
Baǵalaý nátijesinde ár otbasy bes sanattyń birine jatqyzylady:
- A sanaty – ál-aýqaty joǵary;
- V sanaty – ál-aýqaty aýqatty;
- S sanaty – ál-aýqaty qanaǵattanarlyq;
- D sanaty – ekonomikalyq turǵydan osal;
- E sanaty – ekonomikalyq jáne áleýmettik turǵydan osal.
Ministrlik málimetinshe, otbasynyń sanaty tek tabysyna qarap anyqtalmaidy. Máselen, A sanatyna jatqyzý kezinde otbasynyń ár múshesine shaqqandaǵy tabysy kúnkóris deńgeiiniń jeti esesine teń nemese odan joǵary bolýy eskeriledi. Bul shamamen 350 myń teńge jáne odan kóp somany quraidy.
Sonymen qatar otbasynyń turǵyn úii, kommertsiialyq jyljymaityn múlki, biznesi men qymbat kólikteriniń bolýy da baǵalanady.
Otbasynyń tsifrlyq kartasyndaǵy málimetter ai saiyn jańartylady. Eger otbasynyń tabysy azaisa, múlki satylsa nemese otbasy músheleriniń sany ózgerse, onyń áleýmettik-ekonomikalyq jaǵdaiy qaita baǵalanady.
Eger azamat otbasynyń quramy nemese ál-aýqat sanaty qate anyqtalǵan dep eseptese, turǵylyqty jeri boiynsha Eńbek jáne halyqty áleýmettik qorǵaý ministrliginiń tiisti aýmaqtyq departamentine nemese ákimdiktiń jumyspen qamtý jáne áleýmettik baǵdarlamalardy úilestirý basqarmasyna júgine alady.
Mamandar málimetterdi tekserip, qatelerdiń sebebin anyqtaidy. Bastapqy derekkózdegi qate túzetilgennen keiin aqparat kartada avtomatty túrde jańartylady. Bul úshin qaita ótinish berýdiń qajeti joq.
Ministrlik Otbasynyń tsifrlyq kartasy áleýmettik kómekke muqtaj azamattardy der kezinde anyqtap, memlekettik qoldaýdy ár otbasynyń naqty jaǵdaiyna qarai kórsetýge múmkindik beretinin atap ótti.
