Foto: sk.kz
Energetika ministri Almasadam Sátqaliev 1 qarashadan bastap Qashaǵanda óndiris toqtaýy múmkin degen aqparatqa pikir bildirdi, dep habarlaidy Kazinform agenttigi.
«Birneshe aspekt bar. Energetika ministrligi baǵytynda konsortsiýmmen (North Caspian Operating Company) arada jalǵasyp jatqan daý ekologiialyq shyǵaryndylarǵa qatysty emes. Bul — merdigerdiń ónimdi bólý jáne shyǵyndylardy esepke alý týraly kelisimniń sharttaryn oryndaýyna bailanysty taza kommertsiialyq daý. San márte pikir bildirdim. Ol jerde shym-shytyryq protsess júrip jatyr. Jalpy aldyn ala nátijesi belgili bola salysymen kópshilikke aqparat beremiz», — dedi ministr BAQ ókilderine arnalǵan baspasóz máslihatynda.
Onyń atap ótýinshe, qorshaǵan ortany qorǵaý baǵytynda Qashaǵan ken ornynda kúkirt saqtaýǵa bailanysty daý júrip jatyr.
«Sottardyń tiisti sheshimi bar. Ken ornyndaǵy jumystyń toqtaýyna alyp keletin eshqandai faktor joq. Onyń ústinde memlekettik organdar tarapynan da jumysqa kedergi kórip turǵanym joq», — dedi Almasadam Sátqaliev.
