Foto: depositphotos.com
Premer-ministrdiń orynbasary – qarjy ministri Erulan Jamaýbaev qazaqstandyqtardyń qandai uialy aýdarymdaryna salyq salynatynyn túsindirdi, - dep habarlaidy Tengrinews.kz.
"Kelesi jyldan bastap mobildi aýdarymdar bir adamǵa 100-den aspaýy kerek deidi. Bul júie qalai jumys isteidi?" – dep surady jýrnalister Májilis kýlýarynda.
"Qazir banktermen aprobatsiia, pilottyq joba júrip jatyr. Biz úsh ai ishinde bir karta boiynsha 100 aýdarym kriteriiin qoidyq. Baqylaimyz. Bul kriteriiler shartty túrde. Rettei alamyz, múmkin az, múmkin kóp bolýy múmkin (aýdarymdar sany - esk.)", - dep jaýap berdi Erulan Jamaýbaev.
Ol jańa túzetýler kásipkerlik qyzmet sipatyna ie mobildi aýdarymdarǵa salyq salýǵa baǵyttalǵanyn atap ótti.
"Eger bul týystar arasyndaǵy, múmkin áriptester arasyndaǵy qarapaiym aýdarymdar bolsa, ártúrli jaǵdailar bolady - túsinikti, bul kásipkerlik qyzmetke qatysty emes, salyq salynbaidy. Sondyqtan munda basty maqsat – jii júrgiziletin aýdarymdardy fiskalizatsiialaý", - dep tolyqtyrdy vitse-premer.
Jýrnalister syilyqqa aqsha jinaityn mektep oqýshylarynyń ata-analaryna nemese mysaly, jańa perde alýǵa jasalǵan aýdarymdar úshin salyq tóleý kerek pe ekenin naqtylap surady.
"Joq, mundai jaǵdailarda salyq sharalary qabyldanbaidy, óitkeni bul bir rettik tólemder ekenin bilemiz. Mundai aýdarymdar úshin táýekel týdyrmaidy, biraq biznesi bar adamdar úshin táýekel bolady: dúken, taksi jáne t.b. Iaǵni, biznespen tikelei ainalysatyn adamdar", - dep jaýap berdi Qarjy ministrliginiń basshysy.
Ol kásipkerlik qyzmetpen ainalysatyn qazaqstandyqtardy osyndai maqsattar úshin arnaiy shottar ashýǵa shaqyrdy.
"Bul úshin arnaiy kartany, arnaiy shotty ashyńyz jáne qalaǵanyńyzsha aýdarymdar jasai alasyz. Kásipkerlik qyzmettiń belgili bir túrine tirkelip, salyq tóleńiz. Kóleńkede jumys istep jatqan kásiporyndardy osyǵan ákelip jatyrmyz", - dedi Jamaýbaev.
