Қазақстан Ұлттық банкінің Ақша-кредит саясаты комитеті базалық мөлшерлемені 16,25%-ға дейін төмендету туралы шешім қабылдады. Дәліз ±1 пайыздық тармақ деңгейінде сақталды, деп хабарлайды ult.kz.
Ұлттық банк бұл шешімнің инфляцияның баяулауына және инфляциялық күтулердің төмендеуіне байланысты қабылданғанын мәлімдеді.
Тамызда Қазақстандағы жылдық инфляция 9,8%-ға дейін төмендеді. Бұл ретте азық-түлік инфляциясы 9,5%-ды, азық-түлікке жатпайтын тауарлар инфляциясы 11,4%-ды, ал сервистік инфляция 8,9%-ды құрады.
Халықтың алдағы бір жылға инфляциялық күтулері де төмендеген. Шілдеде бұл көрсеткіш 12,1% болды. Маусымда ол 13,4% деңгейінде еді.
Ұлттық банк 2026 жылғы инфляция болжамын 9-11% деңгейінде сақтап отыр. Алайда 2027 жылға арналған болжам 5,5-7,5%-дан 6,5-8,5%-ға дейін көтерілді.
Реттеушінің бағалауынша, инфляция тәуекелдерінің теңгерімі проинфляциялық бағытқа ауысқан. Негізгі тәуекелдер қатарында ішкі сұраныстың өсуі, инфляциялық күтулердің тұрақсыздығы, жанар-жағармай мен коммуналдық қызметтер бағасының өзгеруі, сондай-ақ геосаяси жағдайға байланысты азық-түлік пен энергия бағасының қымбаттауы бар.
Сонымен қатар Ұлттық банк 2026 жылы Қазақстан экономикасы 4,5-5,5%-ға өседі деген болжамын өзгертпеді. 2027 жылы ЖІӨ өсімі шамамен 4,5%, ал 2028 жылы 4-5% болады деп күтіледі.
Ұлттық банктің мәліметінше, инфляцияның қазіргі динамикасы базалық мөлшерлемені төмендетуге мүмкіндік берген. Алайда инфляциялық тәуекелдердің күшеюіне байланысты мөлшерлемені одан әрі төмендету мүмкіндігі шектеулі.
Базалық мөлшерлеме бойынша келесі жоспарлы шешім 2026 жылғы 23 қазанда сағат 12:00-де жарияланады.
