Qazaqstan Ulttyq bankiniń Aqsha-kredit saiasaty komiteti bazalyq mólsherlemeni 16,25%-ǵa deiin tómendetý týraly sheshim qabyldady. Dáliz ±1 paiyzdyq tarmaq deńgeiinde saqtaldy, dep habarlaidy ult.kz.
Ulttyq bank bul sheshimniń infliatsiianyń baiaýlaýyna jáne infliatsiialyq kútýlerdiń tómendeýine bailanysty qabyldanǵanyn málimdedi.
Tamyzda Qazaqstandaǵy jyldyq infliatsiia 9,8%-ǵa deiin tómendedi. Bul rette azyq-túlik infliatsiiasy 9,5%-dy, azyq-túlikke jatpaityn taýarlar infliatsiiasy 11,4%-dy, al servistik infliatsiia 8,9%-dy qurady.
Halyqtyń aldaǵy bir jylǵa infliatsiialyq kútýleri de tómendegen. Shildede bul kórsetkish 12,1% boldy. Maýsymda ol 13,4% deńgeiinde edi.
Ulttyq bank 2026 jylǵy infliatsiia boljamyn 9-11% deńgeiinde saqtap otyr. Alaida 2027 jylǵa arnalǵan boljam 5,5-7,5%-dan 6,5-8,5%-ǵa deiin kóterildi.
Retteýshiniń baǵalaýynsha, infliatsiia táýekelderiniń teńgerimi proinfliatsiialyq baǵytqa aýysqan. Negizgi táýekelder qatarynda ishki suranystyń ósýi, infliatsiialyq kútýlerdiń turaqsyzdyǵy, janar-jaǵarmai men kommýnaldyq qyzmetter baǵasynyń ózgerýi, sondai-aq geosaiasi jaǵdaiǵa bailanysty azyq-túlik pen energiia baǵasynyń qymbattaýy bar.
Sonymen qatar Ulttyq bank 2026 jyly Qazaqstan ekonomikasy 4,5-5,5%-ǵa ósedi degen boljamyn ózgertpedi. 2027 jyly JIÓ ósimi shamamen 4,5%, al 2028 jyly 4-5% bolady dep kútiledi.
Ulttyq banktiń málimetinshe, infliatsiianyń qazirgi dinamikasy bazalyq mólsherlemeni tómendetýge múmkindik bergen. Alaida infliatsiialyq táýekelderdiń kúsheiýine bailanysty mólsherlemeni odan ári tómendetý múmkindigi shekteýli.
Bazalyq mólsherleme boiynsha kelesi josparly sheshim 2026 jylǵy 23 qazanda saǵat 12:00-de jariialanady.
