Қазақстанда 12 қазаннан бастап азаматтарға несие алғаннан кейін 14 күн ішінде одан бас тартуға мүмкіндік беретін жаңа ереже күшіне енді. Бұл туралы Қаржы нарығын реттеу және дамыту агенттігі хабарлады, деп жазады ult.kz.
Жаңа тәртіптің мақсаты – азаматтарға несие алу туралы шешімін қайта қарауға уақыт беру және қаржы ұйымдарының қызмет көрсету шарттарын түсінікті ету.
Қандай несиелерге қатысты?
Жаңа ереже тек кепілсіз тұтынушылық несиелерге қолданылады. Яғни, несие алу үшін үйін, көлігін немесе басқа мүлкін кепілге қоймаған азаматтар осы мүмкіндікті пайдалана алады.
Егер қарыз алушы 14 күн ішінде несиеден бас тартса, банк оған айыппұл сала алмайды. Алайда ақшаны пайдаланған кезең үшін есептелген пайызды төлеу қажет.
Сақтандыру ақшасын қайтаруға бола ма?
Несие рәсімдеу кезінде қосымша сақтандыру қызметін пайдаланған азаматтар одан да бас тарта алады. Мұндай жағдайда сақтандырудың пайдаланылмаған кезеңіне тиесілі қаражат қайтарылады.
Дегенмен банк немесе микроқаржы ұйымы қызмет көрсетуге жұмсалған нақты шығындарын ұстап қалуы мүмкін.
Банктерге қандай талап қойылады?
Несие бермес бұрын банк клиентке 14 күн ішінде одан бас тарту құқығы бар екенін түсіндіруге міндетті. Сондай-ақ қарыз алушыға қайтарылуы тиіс соманы, несие шарттарын және ықтимал тәуекелдерді ашық көрсетуі керек.
Бұдан бөлек, қаржы ұйымдары клиентті несие алуға немесе қосымша ақылы қызметтерді пайдалануға мәжбүрлей алмайды.
Жаңа ереже азаматтардың құқықтарын қорғауға, несие шарттарының ашықтығын арттыруға және қарыз алушылардың қаржылық шешімдерін саналы түрде қабылдауына мүмкіндік беруге бағытталған.
