Qazaqstanda 12 qazannan bastap azamattarǵa nesie alǵannan keiin 14 kún ishinde odan bas tartýǵa múmkindik beretin jańa ereje kúshine endi. Bul týraly Qarjy naryǵyn retteý jáne damytý agenttigi habarlady, dep jazady ult.kz.
Jańa tártiptiń maqsaty – azamattarǵa nesie alý týraly sheshimin qaita qaraýǵa ýaqyt berý jáne qarjy uiymdarynyń qyzmet kórsetý sharttaryn túsinikti etý.
Qandai nesielerge qatysty?
Jańa ereje tek kepilsiz tutynýshylyq nesielerge qoldanylady. Iaǵni, nesie alý úshin úiin, kóligin nemese basqa múlkin kepilge qoimaǵan azamattar osy múmkindikti paidalana alady.
Eger qaryz alýshy 14 kún ishinde nesieden bas tartsa, bank oǵan aiyppul sala almaidy. Alaida aqshany paidalanǵan kezeń úshin eseptelgen paiyzdy tóleý qajet.
Saqtandyrý aqshasyn qaitarýǵa bola ma?
Nesie rásimdeý kezinde qosymsha saqtandyrý qyzmetin paidalanǵan azamattar odan da bas tarta alady. Mundai jaǵdaida saqtandyrýdyń paidalanylmaǵan kezeńine tiesili qarajat qaitarylady.
Degenmen bank nemese mikroqarjy uiymy qyzmet kórsetýge jumsalǵan naqty shyǵyndaryn ustap qalýy múmkin.
Bankterge qandai talap qoiylady?
Nesie bermes buryn bank klientke 14 kún ishinde odan bas tartý quqyǵy bar ekenin túsindirýge mindetti. Sondai-aq qaryz alýshyǵa qaitarylýy tiis somany, nesie sharttaryn jáne yqtimal táýekelderdi ashyq kórsetýi kerek.
Budan bólek, qarjy uiymdary klientti nesie alýǵa nemese qosymsha aqyly qyzmetterdi paidalanýǵa májbúrlei almaidy.
Jańa ereje azamattardyń quqyqtaryn qorǵaýǵa, nesie sharttarynyń ashyqtyǵyn arttyrýǵa jáne qaryz alýshylardyń qarjylyq sheshimderin sanaly túrde qabyldaýyna múmkindik berýge baǵyttalǵan.
