فوتو: اشىق دەرەككٶز
قازاقستاندا جىل سايىن كٷن جىلىنا باستاعاندا, سونداي-اق جازعى مەكتەپ دەمالىسى كەزٸندە بالالاردىڭ تەرەزەدەن قۇلاۋى جيٸلەيدٸ. ونداي جاعدايدا بالالار اۋىر جاراقات الىپ, مٷگەدەك بولىپ قالىپ جاتادى نەمەسە ٶمٸرٸمەن قوشتاسۋى دا مٷمكٸن.
تٶتەنشە جاعدايلار مينيسترلٸگٸنٸڭ دەرەگٸنشە 2024 جىلدىڭ باسىنان بەرٸ (10.07 جاعداي بويىنشا) 112 شۇعىل ەرەكەت ەتۋ قىزمەتٸ كەزەكشٸسٸنٸڭ پۋلتٸنە تۇرعىن ٷيلەردٸڭ تەرەزەلەرٸنەن بالالاردىڭ قۇلاعانى تۋرالى 102 حابارلاما كەلٸپ تٷستٸ. وسىلايشا, اپات سالدارىنان جەتٸ ادام قايتىس بولدى, قالعان 95-ٸ ەرتٷرلٸ جاراقاتتارمەن اۋرۋحاناعا جاتقىزىلدى.
وقىس وقيعالار استانا (18), الماتى (2), شىمكەنت (5) قالالارىندا, قاراعاندى (12), باتىس قازاقستان (6), شىعىس قازاقستان (3), قىزىلوردا (13), اتىراۋ (5), جامبىل (2), قوستاناي (6), اقمولا (5), اقتٶبە (2), پاۆلودار (6), سولتٷستٸك قازاقستان (1), ماڭعىستاۋ (5), اباي (5), ۇلىتاۋ (5), جەتٸسۋ (1) وبلىستارىندا بولعان.
"ٶتكەن جىلى وسىنداي 170 جاعداي تٸركەلدٸ, ول كەزدە 2 مەن 13 جاس ارالىعىنداعى بالالار ەرەسەكتەردٸڭ قاراۋىنسىز قالىپ, تەرەزەلەردەن قۇلاعان. بارلىق جاعدايدا بالالار تەرەزەگە ٶزدٸگٸنەن كٶتەرٸلٸپ, تٸرەۋٸش رەتٸندە ەرتٷرلٸ جيھازداردى قولدانعان نەمەسە موسكيت تورىنا سٷيەنٸپ, ونىمەن بٸرگە تەرەزەدەن قۇلاپ كەتكەن. تٶتەنشە جاعدايلار مينيسترلٸگٸ ەرەسەكتەردٸڭ قاراۋىنسىز قالعان بالالاردىڭ قاۋٸپسٸزدٸگٸنە الاڭداۋشىلىق بٸلدٸرەدٸ", -دەلٸنگەن حابارلامادا.
ٷيدە بولعان كەزدە بالالار, ەڭ الدىمەن ولاردىڭ اتا-انالارى قاۋٸپسٸزدٸك ەرەجەلەرٸن ساقتاۋى كەرەك, -دەپ ەسكەرتەدٸ تجم. ەربٸر اتا-انا بالانىڭ تەرەزەدەن نەمەسە بالكوننان قۇلاپ كەتۋ قاۋپٸن ازايتۋ شارالارىن بٸلۋٸ كەرەك:
ٷيدە كٸشكەنتاي بالا بولسا, تەرەزەلەردٸ اشىق قالدىرماڭىز. ٶيتكەنٸ نازارىڭىزدى بٸر سەكۋندقا باسقا جاققا اۋدارۋدىڭ ٶزٸ بالانىڭ ٶمٸرٸندەگٸ سوڭعى سەت بولۋى نەمەسە ونىڭ بٸرجولا مٷگەدەك بولىپ قالۋى ٷشٸن جەتكٸلٸكتٸ;
تەرەزەنٸ تيٸستٸ قورعاۋمەن جابدىقتالماعان موسكيت تورلارىن پايدالانباڭىز - بالالار مۇنداي تورلارعا سٷيەنٸپ, نەتيجەسٸندە ولارمەن بٸرگە قۇلاپ تٷسەدٸ;
بالالار ٶزدٸگٸنەن تەرەزەنٸ اشا المايتىنداي ەتٸپ, قاۋٸپسٸزدٸك قۇلىپتارىن ورناتىڭىز;
بالانى قاراۋسىز قالدىرماڭىز, ەسٸرەسە تەرەزەلەر مەن شىنى ەسٸكتەردٸڭ جانىندا ويناۋعا جول بەرمەڭٸز;
بالالار تەرەزەنٸڭ الدىنا شىعا المايتىنداي, جيھازداردى ونىڭ جانىنا قويماڭىز.
