فۋتبولدان تالدىقورعاننىڭ «جەتٸسۋ» كومانداسىنا باس باپكەر تاعايىندالدى, دەپ حابارلايدى كلۋبتىڭ باسپاسٶز قىزمەتٸ.
بۇل قىزمەتكە قازاقستاندىق مامان كونستانتين گوروۆەنكو كەلدٸ. ول بۇعان دەيٸن قاراعاندىنىڭ «شاحتەر» كومانداسىندا باس باپكەر قىزمەتٸن اتقاردى.
ك.گوروۆەنكو 1977 جىلدىڭ 10 اقپانىندا جامبىل وبلىسىنىڭ جاڭاتاس قالاسىندا دٷنيەگە كەلگەن. كەسٸبي فۋتبولداعى العاشقى قادامىن 1995 جىلى الماتىنىڭ «قايرات» كومانداسىندا باستادى. ودان كەيٸنگٸ جىلداردا تالدىقورعاننىڭ «جەتٸسۋ», ەلوردالىق «استانا», الماتىنىڭ «الما-اتا», «مەگاسپورت», الماتى وبلىسىنىڭ «سۇڭقار» كلۋبتارىنىڭ نامىسىن قورعادى.
سوڭعى جىلداردا باپكەرلٸك قىزمەت اتقارىپ كەلەدٸ. ٶتكەن جىلى قاراعاندىنىڭ «شاحتەر» كلۋبىنىڭ تٸزگٸنٸن ۇستاپ, پرەمەر-ليگا كوماندالارى اراسىنداعى ەل بٸرٸنشٸلٸگٸندە قاراعاندىلىقتار تٶرتٸنشٸ ورىنعا تۇراقتادى. كوماندا بيىل جاڭا تۋرنير UEFA كونفەدەراتسييا كۋبوگىندا ەل نامىسىن قورعايدى.
ەستەرٸڭٸزگە سالا كەتەلٸك, بۇعان دەيٸن «جەتٸسۋ» كومانداسىندا باس باپكەر قىزمەتٸن قازاقستاندىق مامان دميتريي وگاي اتقاردى. كوماندا بىلتىر ەل بٸرٸنشٸلٸگٸندە التىنشى ورىندى مٸسە تۇتتى.
