قازاقستانداعى بٸلٸم جٷيەسٸ باعدارلاماسى بويىنشا بالالار جازدا 3 اي كانيكۋلعا شىعادى. الايدا بۇل ارالىقتا كٶپ بالا ٶز ٷيلەرٸندە تٶرت قابىرعاعا قاراپ ٸشٸ پىسىپ مازاسىزدانادى. بۇرىن جازعى دەمالىستىڭ ٷلكەن بٶلٸگٸ اۋىلدا, اتا-ەجە مەن تۋىستاردىڭ ورتاسىندا ٶتەتٸن. ال قازٸر كٶبٸندە اۋىلدا اتا-ەجە جوق, قالعان تۋما-تۋىستىڭ ٷيٸنە بالا جٸبەرۋ دە ەبەستٸك. اتا اناعا, مەكتەپكە, قوعامعا نە ٸستەۋگە بولادى?
اتا-انا
سانالى اتا-انا رەتٸندە كانيكۋل باستالماس بۇرىن بالانىڭ ٷش اي جاز دەمالىسى قالاي ٶتەتٸندٸگٸن الدىن الا جوسپارلاعان جٶن. بالا بٸر اي لاگەرگە بارۋى مٷمكٸن, ودان بٶلەك جاڭا سپورتتىق سەكتسييا, ٷيٸرمەنٸ باستاپ كٶرە مە, بالانىڭ ەسٸندە قالاتىنداي وتباسى بولىپ ەل ٸشٸندە قانداي تانىمدىق ساياحاتتار ۇيىمداستىرۋعا بولادى? مۇنىڭ بارلىعى جوسپارلانۋ كەرەك.
مەكتەپ
مەكتەپ جەرگٸلٸكتٸ مۋزەي, كٸتاپحانالارمەن بٸرلەسٸپ جۇمىس ٸستەسە جاقسى. ٶلكەتانۋ بويىنشا ەكسكۋرسييالارعا شىعىپ, تانىمدىق, كٸتاپتالقى كلۋبتارىن ۇيىمداستىرۋ ارقىلى بالالاردىڭ جازعى دەمالىسىنا ات سالىسۋعا بولادى.
قوعام
ەسٸرەسە قوعامدىق مەكەمەلەر مەن كەسٸپكەرلەر بالالار ٷشٸن كٶپ جاقسىلىق جاساي الار ەدٸ. وقۋشىلاردى جازعى دەمالىستا قوعامدىق قىزمەتتەرگە بەلسەندٸ ارالاستىرۋ ەكٸ تاراپقا دا پايدالى بولارى سٶزسٸز. قارتتار ٷيٸنە كٶمەكتەسۋ, ۆولونتەرلٸك جۇمىستار اتقارۋ, كٶشە, ساياباق, ٶزەن, تەڭٸز جاعالاۋى تازالىعىنا ارالاستىرۋ, اۋىل, قالالىق باقتاردى كٷتۋدٸ مەكتەپ وقۋشىلارىنا ەبدەن سەنٸپ تاپسىرۋعا بولاتىن ٸستەر.
ابزالىندا
ەرينە بالا توعىز اي بويى وقىپ, شارشاپ, قالعان ٷش اي جازعى دەمالىستا دا ەڭبەك ەتۋٸ كەرەك دەپ ويلاۋ قاتە. الايدا قازٸرگٸ تاڭدا بالالاردىڭ نەگٸزگٸ ەرمەگٸ تەلەفون, كومپيۋتەر بولىپ كەتكەن زاماندا وقۋشىلاردىڭ اقىل-وي ەڭبەگٸن, دەنە قوزعالىسىن ارتتىراتىن امالدار اسا قاجەت. بالانىڭ جازعى دەمالىسىن وڭتايلى ۇيىمداستىرۋ ەڭ الدىمەن اتا-انانىڭ مٸندەتٸ. دەسە دە جاۋاپتى, دەربەس بالا تەربيەلەۋ بٸر اۋىلدىڭ, ياعني تۇتاس قوعامنىڭ مٸندەتٸ. سول سەبەپتٸ الداعى ۋاقىتتا بالالاردىڭ جازعى دەمالىسىن تەك اقىلى ٷيٸرمە, كۋرستارعا شاقىرۋدان بٶلەك, بالاعا دا, قوعامعا دا پايدالى بولار امالدارمەن تولتىرا الساق ەكەن.
جيھانكەز جۋرناليست دينارا بولات
