مەملەكەت باسشىسى باق سالاسى قىزمەتكەرلەرٸن ماراپاتتاۋ رەسٸمٸندە سٶز سٶيلەدٸ, دەپ حابارلايدى ult.kz.
پرەزيدەنت ەڭ الدىمەن بۇقارالىق اقپارات قۇرالدارى قىزمەتكەرلەرٸن مەرەكەسٸمەن قۇتتىقتاپ, جىلى لەبٸزٸن بٸلدٸردٸ.
قاسىم-جومارت توقاەۆتىڭ پٸكٸرٸنشە, وتاندىق بۇقارالىق اقپارات قۇرالدارى ٶزدەرٸنە جٷكتەلگەن جاۋاپتى ميسسييانى جوعارى دەڭگەيدە اتقارۋ ٷشٸن حالىقارالىق مەديا قوعامداستىقتاعى بەسەكەگە قابٸلەتتٸلٸگٸن ارتتىرۋعا تيٸس.
– نارىقتىڭ تٷبەگەيلٸ ٶزگەرۋٸ سالدارىنان جاڭالىقتار پورتالى, ەلەۋمەتتٸك جەلٸلەر مەن مەسسەندجەرلەر الدىڭعى قاتارعا شىقتى. مەرزٸمدٸ باسپاسٶز بەن تەلەۆيزييا بۇرىنعى ٷستەمدٸگٸنەن ايىرىلدى. الايدا مەن «دەستٷرلٸ مەديانىڭ دەۋرەنٸ ٶتتٸ» دەگەن پٸكٸرمەن كەلٸسپەيمٸن. كەرٸسٸنشە, گازەتتەر مەن تەلەارنالار جاڭا فورماتقا كٶشٸپ, يننوۆاتسييالىق مۋلتيمەدييالىق پلاتفورما قۇرىپ, زامان تالابىنا ساي دامىپ كەلەدٸ. ولاردىڭ باستى ارتىقشىلىعى – مەسەلەنٸ تەرەڭ تالداپ, شولۋ مەن ساراپتاما ۇسىنا الۋىندا. اقپاراتتىق كەڭٸستٸكتە قارابايىر تاقىرىپتار قاپتاپ, ۇساق-تٷيەكتٸ سٶز قىلۋ كٶبەيگەن زاماندا ساپالى ەرٸ ٶزەكتٸ جۋرناليستيكانىڭ ماڭىزى ەسەلەپ ارتادى. سوندىقتان, مەنٸڭ ويىمشا, دەستٷرلٸ باق قىم-قيعاش ۋاقيعالار نٶپٸرٸندە قوعام ٷشٸن اقپارات ايدىنىنداعى كومپاس, تٸپتٸ يدەولوگييالىق باعدار رٶلٸن الداعى ۋاقىتتا دا اتقارا بەرەدٸ, – دەدٸ پرەزيدەنت.
مەملەكەت باسشىسى جۋرناليستەردٸڭ جالعان اقپارات تاراتۋعا قارسى كٷرەستە اتقاراتىن رٶلٸنە توقتالدى.
– تانىمال تۇلعالاردىڭ جاساندى تسيفرلىق بەينەلەرٸن تٷپنۇسقادان اجىراتۋ مٷمكٸن ەمەس. مۇنداي تەحنولوگييالاردى تٷرلٸ الاياقتار مەن دەسترۋكتيۆتٸ كٷشتەر بەلسەندٸ پايدالانادى. سوندىقتان مەديا سالاسىنىڭ قىزمەتكەرلەرٸ جاۋاپكەرشٸلٸك تانىتىپ, مەملەكەتتٸڭ اتالعان گيبريدتٸ, اسا قاۋٸپتٸ قاتەرلەرگە تٶتەپ بەرۋٸنە اتسالىسۋعا تيٸس. وسى ورايدا سٸزدەردٸڭ ەڭبەكتەرٸڭٸز وراسان, – دەدٸ قاسىم-جومارت توقاەۆ.
پرەزيدەنت قازاقستاندا باق قىزمەتٸنە قاجەتتٸ جاعداي جاسالعانىن ايتتى.
– ەلٸمٸزدە پٸكٸر الۋاندىعى مەن سٶز ەركٸندٸگٸ بار, ال تسەنزۋراعا زاڭ جٷزٸندە تىيىم سالىنعان. الايدا, سٶز بوستاندىعى دەگەنٸمٸز جٷگەنسٸزدٸككە جەنە تەرتٸپسٸزدٸككە جول بەرۋ دەگەن سٶز ەمەس. سوندىقتان قوعامدىق پٸكٸردٸ ٶزدەرٸنٸڭ تەرٸس پيعىلىنا پايدالانىپ, مەديا سالاسىندا ايلاسىن اسىرعىسى كەلەتٸندەر مىنا بٸر قاراپايىم قاعيدانى جادىندا ۇستاۋى قاجەت: بٸردە-بٸر ادام شەكسٸز قۇقىق يەسٸ ەمەس. باسقاشا ايتساق, ٶز قۇقىڭدى بٸلۋ جەنە ساقتاۋ ٶزگەنٸڭ قۇقىن بۇزۋ نەمەسە ار-وجدانىن تاپتاۋ دەگەن سٶز ەمەس. الدىمىزدا ادامدار جالعان اقپاراتتىڭ جەتەگٸندە كەتپەي, كٷرٸشتٸ كٷرمەكتەن اجىراتۋى ٷشٸن مەدياساۋاتتىلىقتى بارىنشا ارتتىرۋ مٸندەتٸ تۇر. قوعام قاۋٸپسٸزدٸگٸ مەن قۇقىقتىق تەرتٸپتٸ قامتاماسىز ەتۋ ٷشٸن جاساندى ينتەللەكت تەحنولوگيياسىنىڭ مٷمكٸندٸكتەرٸن كەڭٸنەن پايدالانۋ قاجەت, سونىڭ ٸشٸندە كەز كەلگەن زاڭسىز اقپاراتتى جەدەل انىقتاۋ جەنە بۇعاتتاۋ جۇمىسىن قولعا الۋ ٶتە ماڭىزدى. بٸز زاڭ مەن تەرتٸپكە باعىناتىن ەل رەتٸندە قۇقىقتىق نيگيليزمگە, ەسٸرەشٸلدٸككە, ياعني, راديكاليزمگە جەنە حالقىمىزدىڭ بولمىسىنا جات قۇندىلىقتاردى ناسيحاتتاۋ ٸسٸنە تٷبەگەيلٸ توسقاۋىل قويۋىمىز كەرەك. بۇل – ٶتە ماڭىزدى مٸندەت, – دەدٸ مەملەكەت باسشىسى.
