قىتاي كومپارتيياسىنىڭ تٶراعاسى سي تسزينپين گونكونگتە قىتايعا قارسى تٶرت ايدان استام ۋاقىت نارازىلىق بولىپ جاتقان تۇستا قاتاڭ مەلٸمدەمە جاسادى. ول قىتايدى بٶلشەكتەگٸسٸ كەلەتٸن كەز كەلگەن ەرەكەت سەتسٸز اياقتالاتىنىن, ونداي ەرەكەتتەردٸڭ ورنىندا "مىجىلعان دەنەلەر مەن ۇنتاققا اينالعان سٷيەكتەر" عانا قالاتىنىن ايتتى. بۇل تۋرالى AFP جاڭالىقتار اگەنتتٸگٸ حابارلادى.
AFP حابارلاۋىنشا, قىتاي رەسمي اقپارات قۇرالدارى سي تسزينپين ٶتكەن جەكسەنبٸدە نەپالعا بارعان ساپارىندا وسىلاي مەڭزەي سٶيلەگەنٸن جازعان.
بۇل مەلٸمدەمە گونكونگتە جەكسەنبٸ كٷنٸ شەرۋگە شىققاندار مەن پوليتسييا تاعى دا قاقتىعىسىپ, تايۆان مەن قىتاي قاتىناسى ۋشىعىپ تۇرعان كەزدە ايتىلعان. پەكين تايۆاندى ٶزٸنٸڭ اۋماعى سانايدى.
قىتاي بۇعان دەيٸن بريتانييانىڭ بۇرىنعى وتارى گونكونگتەگٸ قارسىلىقتى "سىرتقى كٷشتەر قوزدىرادى" دەگەن ەدٸ.
AFP ماقالاسىندا سي تسزينپيننٸڭ قاتاڭ مەلٸمدەمە جاساۋىنا تٷرتكٸ بولعان جايتتاردىڭ بٸرٸ - اقش-تىڭ پەكيندٸ شىڭجاڭداعى ساياسي قۋعىن-سٷرگٸن ٷشٸن سىناعانى بولۋى مٷمكٸن دەپ سانايدى. اقش قىتايدىڭ سولتٷستٸك-باتىس ايماعى شىڭجاڭدا يسلام دٸنٸن ۇستاناتىن تٷركٸ تٸلدٸ از ۇلتتىڭ ميلليوننان استام ادامىن "ساياسي قايتا تەربيەلەۋ لاگەرٸندە" مەجبٷرلەپ ۇستاعانىن سىناعان. پەكين ونى "كەسٸبي دايىندىق ورتالىقتارى" دەپ اتاپ, "سەپاراتيزممەن جەنە دٸني ەكسترەميزممەن كٷرەس ماقساتىندا ۇيىمداستىرىلدى" دەپ تٷسٸندٸرگەن.
قۇقىق قورعاۋشىلار مەن باتىس ەلدەرٸ قىتايدى اقپارات شەكتەيتٸن, بيلٸكتەگٸ شىنايى ساياسي بەسەكەلەستەرٸن قۋعىندايتىن, ەسٸرەسە تيبەت پەن شىڭجاڭدا ادام قۇقىعىن بۇزاتىن ەل دەپ سىنايدى.
2018 جىلى بۇۇ دا قىتايدىڭ "ەكسترەميزممەن كٷرەس ورتالىقتارىندا" ميلليونعا جۋىق تٷركٸ تٸلدٸ از ۇلت ٶكٸلدەرٸ كٷشپەن قامالاتىنىن مەلٸمدەگەن.
قىتايدان قۋىلعان 20 مىڭعا جۋىق تيبەتتٸكتەر نەپالدا تۇرادى, الايدا پەكيننٸڭ قىسىمىمەن نەپالدىڭ قازٸرگٸ كوممۋنيستٸك بيلٸگٸ ولارعا قاتىستى ساياساتىن قاتاڭداتا تٷسكەن دەپ جازادى AFP. نەپال پرەمەر-مينيسترٸ كحادگا پراساد شارما ولي قىتاي جەتەكشٸسٸمەن ەڭگٸمەسٸندە "ەشبٸر كٷشتٸڭ نەپال اۋماعىن قىتايعا قارسى سەپاراتيستٸك ٸس-ەرەكەتكە پايدالانۋىنا جول بەرمەيتٸنٸن" ايتقان.
گونكونگتەگٸ قارسىلىق اكتسييالارى تٶرت ايدان بەرٸ جالعاسىپ جاتىر. شەرۋگە شىققاندار باستاپقىدا "قىلمىسكەرلەردٸ قىتايعا ەكستراديتسييالاۋ تۋرالى" زاڭدى قاراستىرۋدى توقتاتۋعا قول جەتكٸزگەن ەدٸ. ودان كەيٸن تالاپ اۋقىمى ۇلعايا تٷستٸ. ونىڭ ٸشٸندەگٸ ەڭ باستىلارى – قالا اۆتونوميياسىن ساقتاۋ جەنە گونكونگ بيلٸگٸن قىزمەتٸنەن كەتٸرۋ. قىتاي گونكونگكە ەسكەر كٸرگٸزۋٸ مٷمكٸن دەگەن قاۋٸپ ايتىلعان, الايدا پەكين گونكونگ پوليتسيياسى "قارسىلىق اكتسييالارىن ٶز بەتٸنشە باسا الادى" دەپ بٸرنەشە رەت مەلٸمدەگەن بولاتىن.
