وسىدان 45 جىل بۇرىن سول كەزدەگٸ سەمەي وبلىسى, شۇبارتاۋ اۋدانىنىڭ كومسومول ۇيىمى باستاما كٶتەرٸپ, مەكتەپ بٸتٸرەتٸن جاستاردى قوي شارۋاشىلىعىنا كەلۋگە شاقىرعان ەدٸ. بۇل باستاما وداق كٶلەمٸندە قولداۋ تاۋىپ, سول قولداۋدىڭ ارقاسىندا شالعايداعى شۇبارتاۋعا جارىق كەلٸپ, تەلەديدار قوسىلىپ, اياگٶز بەن قاراعاندى باعىتىنا كٷرە جول سالىنعانىن اعا بۋىن ٶكٸلدەرٸ جاقسى بٸلسە كەرەك. ال ...45 جىلدان كەيٸن كەزٸندە مىڭعىرتىپ مال باققان شۇبارتاۋ ٶڭٸرٸندە قوي باعاتىن جاستار قالمادى دەگەنگە بٸرەۋ سەنەر, بٸرەۋ سەنبەس. شامامەن قىرىق بەس جىل بۇرىن سالىنعان جول دا سول سالىنعاننان بەرٸ جٶندەۋ كٶرمەگەن بولار, سٸرە!
جۇرتتى شارشاتقان جول
«ايتا, ايتا التايدى, جامال اپام قارتايدى» دەمەكشٸ, شۇبارتاۋ ٶڭٸرٸن ٷش كٷنگە جۋىق ارالاعاندا قاي اۋىلعا بارساق تا جۇرتتان ەستٸگەن ەڭ ەۋەلگٸ سٶزٸمٸز «جول» بولدى. تۇرعىندار جولدىڭ جايىن ايتا-ايتا شارشاعاندارىن ايتادى. اۋدان ورتالىعى اياگٶز بەن بۇرىنعى شۇبارتاۋ اۋدانىنىڭ ورتالىعى بارشاتاستىڭ اراسى 175 شاقىرىم ەكەن. وسى قاشىقتىقتى تۇرعىندار 4-5 ساعات جٷرەتٸن كٶرٸنەدٸ. «اياگٶزدەگٸ ساعات 10-داعى جينالىسقا بارۋ ٷشٸن تاڭعى ساعات 3-4 كەزٸندە جولعا شىعامىز. ەيتٸپ-بٷيتٸپ ٷيگە جەتكەنشە ىمىرت ٷيٸرٸلەدٸ. اۋدان ورتالىعىنا 250 شاقىرىم جەردەگٸ ەمەلتاۋ اۋىلىنىڭ تۇرعىندارىنا تٸپتٸ قيىن. ولار بٸزدەن دە قاشىقتا جاتىر عوي. جول جاقسى بولسا, 175 شاقىرىم دەگەنٸڭ 2 ساعاتتىق جول ەمەس پە?!», - دەيدٸ بايقوشقار اۋىلىنىڭ ەكٸمٸ ساياتبەك شىمىروۆ.
«اياگٶز بەن بارشاتاس اراسىنداعى جولدىڭ جاعدايى بارلىعىمىزدى الاڭداتادى. بۇل مەسەلەگە اۋدان باسشىلىعى دۇرىس كٶڭٸل بٶلمەي وتىر. كٶڭٸل بٶلسە, جىلىنا جوق دەگەندە 20 شاقىرىمنان جٶندەپ وتىرسا, ەلدەقاشان بۇرىنعى اۋدان ورتالىعى بارشاتاسقا جەتكەن بولار ەدٸ عوي», - دەيدٸ مەدەنيەت اۋىلىندا تۇراتىن, ەل مەن جەردٸڭ جاعدايىنا قانىق سوۆەت مۇقاشەۆ اقساقال.
«بۇل جول ناۋقاس تۇرماق, ساۋ ادامدى اۋرۋ قىلادى. جۇمىستىڭ كٶبٸ اۋدان ورتالىعىندا بٸتەتٸندٸكتەن, ەرٸكسٸز بارۋعا تۋرا كەلەدٸ. بارلىق مەكەمە سوندا عوي. مىنا ٸرگەدەگٸ 30 شاقىرىمعا جۋىق بايقوشقار, 40 شاقىرىم جەردەگٸ مالگەلدٸ, باسقا دا اۋىلداردان سىرقاتتانعان جاندار ەۋەلٸ بٸزگە, بارشاتاسقا كەلەدٸ. قولىمىزدان كەلگەن ەم-دومىمىزدى جاسايمىز, شامامىز جەتپەسە, اياگٶزگە جٸبەرەمٸز. ٶزدەرٸڭٸز ويلاي بەرٸڭٸزدەر», - دەيدٸ بارشاتاس اۋىلدىق اۋرۋحاناسىنىڭ ۋچاسكەلٸك تەراپەۆتٸ سالتانات گايسينا.
وسى ٶڭٸردٸ بەتكە الاردا «ەڭ ەۋەلٸ قاي اۋىلدارعا بارعانىمىز دۇرىس?» دەپ جٶن سۇراعاندا «شۇبارتاۋدىڭ جايىنا قانىققىلارىڭ كەلسە, ەڭ تٷكپٸردە, ەلدٸڭ شەتٸندە, جەلدٸڭ ٶتٸندە جاتقان ەمەلتاۋ مەن جورعاعا بارىڭدار», – دەپ جول سٸلتەگەن-دٸ ەلدٸڭ جايىن بٸلەتٸن اعالارىمىز. بٸراق جورعاعا بارا المادىق. كەزٸندە ٶز الدىنا مەكتەبٸ, شاعىن ەمحاناسى, 500-گە تارتا تۇرعىنى بولعان ەلدٸ مەكەندە بٷگٸندە بٸر عانا شارۋا قوجالىعى وتىرعانىن ەستٸپ, قاراعاندى وبلىسىمەن شەكارالاس ەمەلتاۋ اۋىلىنا بارۋدى جٶن دەپ شەشتٸك.
يەندەگٸ ينتەرنەتسٸز اۋىلدار
اياگٶزدەن گٶرٸ قاراعاندى وبلىسىنا تاقاۋ ورنالاسقان, تابيعاتى دا ٶزگەشە بۇل اۋىلدا 511 ادام تۇرادى ەكەن. كەزٸندە شۇبارتاۋ سوفحوزى رەتٸندە دٷركٸرەپ تۇرعان تۇستا مۇندا 36 مىڭ قوي, 4 مىڭ جىلقى بولىپتى. بٷكٸل شۇبارتاۋ ٶڭٸرٸنٸڭ جىلقىسى وسى جەردە باعىلىپتى. ەمەلتاۋ اۋىلىنىڭ ەكٸمٸ راقىمبەك ىبىرايۇلى بٷگٸندە كەشەگٸ اقتىلى قويدان 10 مىڭ, الالى جىلقىدان 400 باس قالعانىن ايتتى. اۋىل تۇرعىندارىنىڭ دەنٸ مال باعىپ, ٶز كٷندەرٸن ٶزدەرٸ كٶرٸپ وتىرعانىمەن, بٸراز بٶلٸگٸ ەلدٸمەكەننٸڭ ٸرگەسٸندەگٸ شارىق پەن تاسقورا, قاراعاندى وبلىسىنا قاراستى ساياق كەنٸشتەرٸندە ەڭبەك ەتەدٸ ەكەن.
«اۋىلدىڭ تالاي ادامدارىن وسى كەن ورىندارى ۇستاپ تۇر دەۋگە بولادى. قولدان كەلگەن كٶمەكتەرٸن ايامايدى. مەسەلەن, شارىق كەن ورنى اۋىل تۇرعىندارىنان ەتتٸ 1200, سٷتتٸ 100 تەڭگەدەن ساتىپ الادى. مەكتەپتٸڭ 34 وقۋشىسىن ىستىق تاماقپەن قامتاماسىز ەتەدٸ. التىن ٶندٸرەتٸن تاسقورا مەن كەزٸندە مرامور شىعارعان تاسوبا كەنٸشتەرٸ قازٸر توقتاپ تۇر. وسى ەكٸ كەن ورنىنىڭ جۇمىسى جاندانسا, حالىققا ەجەپتەۋٸر كٶمەك بولار ەدٸ», - دەگەن اۋىل ەكٸمٸ سٶز اراسىندا ەلدٸمەكەندە ەلٸ كٷنگە دەيٸن ينتەرنەت پەن ۇيالى بايلانىستىڭ جوقتىعىن ايتىپ قالدى.
وبلىس ورتالىعى ٶسكەمەننەن 500, اۋدان ورتالىعى اياگٶزدەن 250 شاقىرىم قاشىقتىقتا جاتقان اۋىلداعى تاعى بٸر تٷيتكٸلدٸ مەسەلە – كەپٸلدٸك جايى. ەمەلتاۋ اۋىلدىق وكرۋگٸنٸڭ باس مامانى ٶمٸر جولدىبالين ەلدٸمەكەننٸڭ 14 تۇرعىنى كەپٸلدٸكتٸڭ كەسٸرٸنەن نەسيە الا الماي وتىرعانىن جەتكٸزدٸ.
«بٸرٸ مال بورداقىلاۋ الاڭىن اشسام دەيدٸ. ەندٸ بٸرەۋٸ تٸگٸن تسەحىن, تاعى بٸرٸ كٶلٸكتەرگە قىزمەت كٶرسەتەتٸن ورتالىق اشقىسى كەلەدٸ. ولاردىڭ كەپٸلدٸككە قوياتىن تەحنيكالارى دا, قالادا ٷيلەرٸ دە جوق. بانكتەر 2010 جىلدان بەرگٸ كٶلٸكتەردٸ عانا كەپٸلدٸككە الادى. اۋىلداعى قۇنى ەرٸ كەتسە 300-400 مىڭ تەڭگەدەن اسپايتىن ٷيلەردٸ ولار دۇرىس باعالاماي وتىر», - دەيدٸ اۋىلداعى شارۋالاردىڭ قۇجاتتارىن جيناپ, اياگٶز بەن ەكٸ ورتادا الاشاپقىن بولىپ جٷرگەن باس مامان.
كەپٸلدٸك, ۇيالى بايلانىس پەن ينتەرنەت مەسەلەسٸ جالعىز ەمەلتاۋدا عانا ەمەس, بۇرىنعى شۇبارتاۋ اۋدانىنا قاراعان اۋىلداردىڭ كٶپشٸلٸگٸندە باس اۋرۋىنا اينالىپ وتىرعانىن اڭعاردىق. ەمەلتاۋ, ٶركەن, بايقوشقار اۋىلدارىندا قالتا تەلەفونى مٷلدە ۇستامايدى ەكەن. قالعان اۋىلداردا ۇيالى بايلانىس بٸردە ۇستاپ, بٸردە ۇستامايتىنىن, ينتەرنەتتٸڭ تەك مەكتەپتە, ونىڭ ٶزٸ ٸلدەبايلاپ, ەزەر ۇستايتىنىن, جىلدامدىعى ٶتە تٶمەن ەكەنٸن تۇرعىنداردىڭ ٶز اۋزىنان ەستٸدٸك.
10 مىڭ تۇرعىنعا – 5 دەرٸگەر
شۇبارتاۋعا ارنايى ات باسىن بۇرعان سوڭ بۇرىنعى اۋدان ورتالىعى بارشاتاسقا سوقپاي كەتكەنٸمٸز جاراماس دەپ اۋىلداعى دەرٸگەر, مۇعالٸم قاۋىمىمەن جٷزدەسٸپ, اقساقالدارمەن تٸلدەستٸك.
كەزٸندە 5 مىڭنان استام تۇرعىنى بولعان بارشاتاس اۋىلىندا بٷگٸندە 2281 ادام تۇرادى. بۇرىن 700-گە تارتا وقۋشىسى بولعان مەكتەپتە قازٸر 317 بالا بٸلٸم الىپ جاتقان كٶرٸنەدٸ. بالاباقشادا 50 بٷلدٸرشٸن بار ەكەن. جۇمىسقا كٸرٸسكەنٸنە 8 اي عانا بولعان اۋىلدىڭ جاڭا ەكٸمٸ باقىتجان جۇماحانوۆ ەلدٸمەكەندەگٸ مەسەلەلەردٸ جاسىرماي ايتىپ, سوڭعى جىلدارى حالىقتىڭ كٶشۋٸ بۇرىنعىعا قاراعاندا سايابىرسىعانىمەن, جاستاردىڭ ازايىپ, زەينەتكەرلەردٸڭ كٶبەيٸپ, دەموگرافييا مەسەلەسٸنٸڭ قيىن بولىپ تۇرعانىن قينالا جەتكٸزدٸ. اۋىلدا تۇراقتى جۇمىس ورىندارى از بولعاندىقتان, مەكتەپ تٷلەكتەرٸنٸڭ كٶبٸنٸڭ تۋعان مەكەندەرٸنە ورالعىسى كەلمەيتٸنٸن تٸلگە تيەك ەتتٸ. «بارشاتاستا جۇمىس تابۋ قيىنداۋ بولىپ تۇر. اۋىلدىڭ كەيبٸر تۇرعىندارى ماڭايداعى كەنٸشتەرگە بارىپ جۇمىس ٸستەپ جٷر. شۇبارتاۋدا مالدان باسقا نە بار?! مالمەن شۇعىلدانعىسى كەلەتٸن تۇرعىندار بار. سولارعا كٶمەكتەسەيٸك دەپ «بارشاتاس اگرو», «شۇبارتاۋ اگرو» دەگەن اۋىل شارۋاشىلىق كووپەراتيۆتەرٸن قۇرىپ جاتىرمىز», - دەگەن اۋىل ەكٸمٸ شۇبارتاۋ ٶڭٸرٸندە ورنالاسقان كەن ورىندارى جەرگٸلٸكتٸ تۇرعىنداردى جۇمىسقا كٶبٸرەك السا, وسى مەسەلەگە اۋدان, وبلىس باسشىلىعى تاراپىنان نازار اۋدارىلىپ, كٶڭٸل بٶلٸنسە دەگەن ٶتٸنٸش ايتتى.
ال بارشاتاستاعى جالعىز مەكتەپتٸڭ ديرەكتورى گٷلنۇر سيقىمباەۆا وقۋشىلارعا زامان تالابىنا ساي بٸلٸم بەرۋگە تىرىسىپ جاتقاندارىمەن, ينتەرنەت, كومپيۋتەر سەكٸلدٸ دٷنيەلەردٸڭ جەتٸسپەۋشٸلٸگٸ قولبايلاۋ بولىپ وتىرعانىن جاسىرمادى. «مەكتەپتە وقۋشىلارعا بٸلٸم بەرەتٸن بارلىق جاعداي بار. مۇعالٸمدەرٸمٸز دە بٸلٸكتٸ. بٸزدٸ قينايتىنى – مەكتەپتٸڭ كومپيۋتەرلەرمەن دۇرىس جابدىقتالماۋى. بٸر عانا كومپيۋتەر بٶلمەسٸ بار. وندا 18 كومپيۋتەر ورنالاسقان. كٶبٸ ەسكٸرگەن. 100 بالاعا 3-4 كومپيۋتەردەن كەلەدٸ. تاعى بٸر مەسەلە, بٸزدە اۆتو مەكتەپ جۇمىس ٸستەيدٸ. مۇنداعى اينالدىرعان ەكٸ تەحنيكانىڭ ەكەۋٸ دە توزىپ تۇر. وسى جاعىنان كٶمەك بولسا, جاڭا تەحنيكالار ساتىپ ەپەرٸلسە, وقۋشىلارىمىزدى مەكتەپ بٸتٸرگەندە دايىن كەسٸبي مامان رەتٸندە ەزٸرلەپ شىعارار ەدٸك», - دەيدٸ مەكتەپ ديرەكتورى.
بۇرىنعى اۋدان ورتالىعىنداعى حالىقتىڭ بٸراز بٶلٸگٸن جۇمىسپەن قامتىپ وتىرعان مەكەمەنٸڭ بٸرٸ – بارشاتاس اۋىلدىق اۋرۋحاناسى. ٷلكەندٸگٸ وبلىس ورتالىعىنداعى اۋرۋحانالاردان كەم تٷسپەيتٸن عيماراتتىڭ كٶپ بٶلٸگٸ قاڭىراپ بوس تۇرعانىن بايقادىق. بٷگٸندە مۇندا ۇزىن سانى 50 ادام ەڭبەك ەتكەنٸمەن سونىڭ 5-ۋٸ عانا دەرٸگەر. مەكەمەنٸڭ باس دەرٸگەرٸ مارات ٶنەرباەۆپەن ەڭگٸمەلەسكەنٸمٸزدە قازٸرگٸ ۋاقىتتا ەمحانادا حيرۋرگ, وكۋليست سىندى مامانداردىڭ ورنى بوس تۇرعانىن, مۇنداعى ۋلترا دىبىستى تەكسەرۋ قۇرىلعىسىنىڭ ەسكٸرگەنٸن ايتىپ, جاڭادان بەرٸلسە دەگەن ٶتٸنٸشٸن ايتتى. «ٶيتكەنٸ, بٸز تەك بارشاتاسقا عانا ەمەس, بايقوشقار, ەمەلتاۋ, مەدەنيەت, ٶركەن, مالگەلدٸ, قوساعاش, بيدايىق سەكٸلدٸ اۋىلدارعا, ۇزىن سانى 10 مىڭعا جۋىق حالىققا قىزمەت كٶرسەتەمٸز. ەگەر ەمحاناعا جاڭا ۋتد قۇرىلعىسى قويىلسا, تۇرعىنداردى 175 شاقىرىم اياگٶزگە سابىلتپاي وسى جەردە-اق مەديتسينالىق قىزمەت كٶرسەتەر ەدٸك. ٶزٸ ناۋقاس ادامدى سونشا جەرگە جٸبەرۋ قانشالىقتى قيىن ەكەنٸ ايتپاسا دا تٷسٸنٸكتٸ عوي. اياعى اۋىر ەيەلدەردٸ دە اياگٶزگە جٸبەرەمٸز. جارايدى, ولار اۋدان ورتالىعىندا بوسانسىن. وعان قارسىلىعىمىز جوق. الايدا بوسانعانعا دەيٸنگٸ مەديتسينالىق قىزمەتتەردٸ وسى جەردە-اق كٶرسەتسەك بولماي ما?» -, دەيدٸ باس دەرٸگەر.
«اقتوعان» سۋ بٶگەتٸ قايتا قالپىنا كەلە مە?
ەلباسى نۇرسۇلتان نازارباەۆ بيىلعى حالىققا ارناعان جولداۋىندا جەردٸ پايدالانۋدىڭ تيٸمدٸلٸگٸن ارتتىرۋدىڭ ماڭىزدىلىعىنا توقتالىپ, «سۋارمالى ەگٸس الاڭىن 5 جىل ٸشٸندە 40 پايىزعا كەڭەيتٸپ, 2 ميلليون گەكتارعا جەتكٸزۋ قاجەت» دەگەن ەدٸ. مەملەكەت باسشىسى جٷكتەگەن مٸندەتتٸ جٷزەگە اسىرۋعا بٷگٸندە كٶپ بٶلٸگٸ يگەرٸلمەي بوس جاتقان شۇبارتاۋدىڭ كەڭ دالاسى ەبدەن سۇرانىپ تۇر دەۋگە بولادى. بۇل ٶڭٸردەگٸ كٶپ جىلدان بەرٸ ەسكەرٸلمەي, نازاردان تىس قالىپ, جٶندٸ كٶڭٸل بٶلٸنبەي كەلە جاتقان مەسەلەنٸ مەدەنيەت اۋىلىندا تۇراتىن سوۆەت مۇقاشەۆ اقساقالدىڭ اۋزىنان ەستٸدٸك. كەزٸندە شۇبارتاۋ سوۆحوزىنىڭ ديرەكتورى, كٶكتال سوفحوزىنىڭ فەرما مەڭگەرۋشٸسٸ قىزمەتتەرٸن اتقارعان اقساقالدىڭ ايتۋىنشا, قوساعاش اۋىلى ماڭىنداعى باقاناس ٶزەنٸندەگٸ «اقتوعان» سۋ بٶگەتٸ سوۆەت زامانىندا شۇبارتاۋدىڭ بٸر ەمەس, بٸرنەشە اۋىلىن مال ازىعىمەن قامتاماسىز ەتٸپتٸ. سول كەزدەرٸ بەس مىڭ گەكتار سۋارمالى جەردٸڭ يگٸلٸگٸن بۇرىنعى اۋدان ورتالىعى بارشاتاستىڭ دا حالقى كٶرگەن ەكەن.
«اۋدان تاراعاننان كەيٸن «اقتوعانمەن» قوش ايتىستىق. ەسٸگٸن, ٶزگە دە قۇرىلعىلارىن كٶز الدىمىزدا توناپ, مەتوللومعا ٶتكٸزدٸ. يەسٸز قالدى. يەسٸز قالعاننان كەيٸن توزدى, بٷلٸندٸ. ودان كەيٸن ەكٸمدٸكتەگٸلەر جٶندەگەن بولدى, جاساعان بولدى. بٸراق نەتيجە جوق. ٶزەن قاتتى تاسىعاندا بۇزىپ كەتەدٸ. ەگەر ٷكٸمەتتەن قوماقتى قارجى بٶلٸنٸپ, وسى توعان قالپىنا كەلتٸرٸلسە, تٶرت بٸردەي اۋىل – بارشاتاس, قوساعاش, مەدەنيەت پەن بيدايىقتىڭ حالقى يگٸلٸگٸن كٶرەر ەدٸ. بۇل كەزٸندە بٷكٸل شۇبارتاۋ اۋدانىن سۋمەن قامتاماسىز ەتكەن جەر عوي. شۇبارتاۋدىڭ شارۋالارى جىل سايىن قىسقى مال ازىعىن دايىنداۋ ٷشٸن قاڭعىپ جٷرٸپ شٶپ شابادى. ٶزەننٸڭ بويىنداعى دايىن تۇرعان سۋارمالى جەردٸ نەگە قالپىنا كەلتٸرمەسكە?!», - دەيدٸ سوۆەت اقساقال. مەدەنيەت اۋىلدىق وكرۋگٸنٸڭ ەكٸمٸ باۋىرجان مۇقاشەۆ سۋ بٶگەتٸنٸڭ جوباسىن جاساۋ ٷشٸن 5 ميلليون تەڭگە كٶلەمٸندە قاراجات قاجەت ەكەندٸگٸن ايتادى. ونىڭ ايتۋىنشا, سۋ ارناسىن قايتا قالپىنا كەلتٸرۋ ٷشٸن 200 ميلليون تەڭگە شاماسىندا قارجى كەرەك. بۇعان ەرينە, اۋدان مەن وبلىستىڭ شاماسى جەتپەيتٸنٸ انىق...
تٷيٸن
شۇبارتاۋداعى حالىقتى تولعاندىرعان ەڭ ٷلكەن مەسەلە جول ەكەنٸن ايتتىق. تٷيتكٸلدٸ مەسەلەنٸ شەشۋ باعىتىندا اۋدان تاراپىنان قانداي جۇمىستار اتقارىلدى? الدا نەندەي جوسپارلار بار? بۇل جٶنٸندە اياگٶز اۋداندىق مەسليحاتىنىڭ حاتشىسى سەيٸلبەك ىسقاقوۆ قىسقاشا ايتىپ بەردٸ.
«بۇل ٶڭٸردٸڭ نەگٸزگٸ پروبلەماسى - رەسپۋبليكالىق ماڭىزداعى «قاراعاندى-بوعاس» باعىتىنداعى اياگٶز بەن مالگەلدٸ اۋىلىنىڭ اراسىنداعى 245 شاقىرىمدىق جول. جەرگٸلٸكتٸ تۇرعىندار جولدىڭ ازابىن كٶپتەن بەرٸ تارتىپ كەلەدٸ. بۇل مەسەلەنٸ پارلامەنت مەجٸلٸسٸنٸڭ دەپۋتاتتى نۇرتاي سابيليانوۆ تا تالاي مەرتە كٶتەردٸ. اۋدان باسشىسى دا بۇل شارۋامەن شۇعىلدانىپ جٷر. وسى ٶڭٸردٸڭ تۋماسى ەرٸ وسى جاقتان سايلانعان دەپۋتات رەتٸندە ٶزٸم دە جول مەسەلەسٸن ٷنەمٸ نازاردا ۇستاپ كەلەمٸن. بىلتىر شۇبارتاۋدىڭ جولدارىنىڭ بٸراز بٶلٸگٸنە توپىراق تٶگٸلدٸ. بيىل وسى جولدىڭ 10 شاقىرىمىنا (اياگٶزدەن شىققاننان كەيٸنگٸ 50 شاقىرىمنان 60 شاقىرىمعا دەيٸنگٸ ارالىق) ورتاشا جٶندەۋ جۇمىستارى جٷرگٸزٸلەدٸ. وبلىس باسشىلىعى دا بۇل مەسەلەدەن حاباردار. وبلىس ەكٸمٸنٸڭ ورىنباسارى سەرٸك اقتانوۆ بۇل جولدىڭ جاعدايىن جاقسى بٸلەدٸ. ول كٸسٸ بيىل 20 ماۋسىمنان باستاپ بارشاتاسقا دەيٸنگٸ جولعا جاماۋ جۇمىستارى جٷرگٸزٸلەتٸنٸن ايتتى», - دەگەن اۋداندىق مەسليحات حاتشىسى شۇبارتاۋ ٶڭٸرٸندەگٸ ينتەرنەت, ۇيالى بايلانىس, دەنساۋلىق ساقتاۋ سالاسىنا قاتىستى مەسەلەلەرگە الداعى ۋاقىتتا دا قوزعاۋ سالىناتىنىن جەتكٸزدٸ.
ازامات قاسىم
شىعىس قازاقستان وبلىسى, اياگٶز اۋدانى.
سۋرەتتەردٸ تٷسٸرگەن - اۆتور
