گرۋزييانىڭ بۇرىنعى پرەزيدەنتٸ, ودەسسا وبلىسىنىڭ ەكس-باسشىسى ميحايل سااكاشۆيلي ۋكراينا پرەزيدەنتٸ ۆلاديمير زەلەنسكييدەن ٶزٸنە ۋكراينا ازاماتتىعىن قايتارىپ بەرۋدٸ سۇرادى. بۇل تۋرالى سااكاشۆيليدٸڭ حاتىن زەلەنسكيي ەكٸمشٸلٸگٸنە تاپسىرعان ادۆوكات حابارلادى, دەپ جازادى ازاتتىق.
حاتتا ساياساتكەر ۋكراينا كونستيتۋتسيياسى مەن "ادامدى ازاماتتىقسىز قالدىرۋعا بولمايدى" دەگەن حالىقارالىق ەرەجەگە قايشى كەلسە دە, كيەۆتٸڭ ٶزٸن ازاماتتىقتان ايىرعانىن ايتادى. ول زەلەنسكييدەن ەلگە كٸرٸپ, سوتتا ٶز قۇقىعىن قورعاۋعا رۇقسات بەرۋدٸ سۇرايدى. سااكاشۆيلي حاتتا ٶزٸنە "ەشبٸر لاۋازىم قاجەت ەمەسٸن" جازعان.
2004-2013 جىلدارى گرۋزييانى باسقارعان رەفورماتور سااكاشۆيلي 2015 جىلى ۋكراينا ازاماتتىعىن قابىلداپ, گرۋزييا ازاماتتىعىنان ايىرىلعان. سول كەزدە ونى ۋكراينانىڭ ەكس-پرەزيدەنتٸ پەتر پوروشەنكو ودەسسا وبلىسىنىڭ گۋبەرناتورى ەتٸپ تاعايىنداعان. سااكشاۆيلي بۇل قىزمەتتٸ از ۋاقىت اتقاردى دا, 2016 جىلعى قاراشادا ٷكٸمەتتٸ جەمقورلىقپەن كٷرەسٸنە كەدەرگٸ جاسادى دەپ ايىپتاپ, وتستاۆكاعا كەتكەن. سودان كەيٸن پرەزيدەنتتٸ قاتتى سىناي باستاعان.
2014 جىلعى باتىسشىل ەۋرومايدان شەرۋٸنەن كەيٸن رەسەيگە قاشقان ۆيكتور يانۋكوۆيچتٸڭ ورنىنا سايلانعان پەتر پوروشەنكو بىلتىر شٸلدەدە شەتەلدە جٷرگەن سااكاشۆيليدٸ ۋكراينا ازاماتتىعىنان ايىرعان. ۋكراينا بيلٸگٸ سااكاشۆيليدٸ يانۋكوۆيچتٸڭ "قىلمىستىق توبىنا قاتىسى بار" جەنە "رەسەيدٸڭ كيەۆكە قارسى ارانداتۋ جوسپارىنىڭ بٸر بٶلٸگٸ" دەپ ايىپتايدى. گرۋزييا پرەزيدەنتٸ بولىپ تۇرعان كەزٸندە رەسەيمەن قارۋلى قاقتىعىستى باستان ٶتكەرگەن سااكاشۆيلي بۇل ايىپتاۋلاردى "ابسۋرد" دەپ سيپاتتايدى.
ميحايل سااكاشۆيلي رەسمي تٷردە ازاماتتىعى جوق ادام دەپ تانىلىپ, نيدەرلاندتا تۇرۋعا ىقتييار حات العان.
