رەسەيدٸڭ فەدەرالدىق ۆەتەرينارلىق جەنە فيتوسانيتارلىق قاداعالاۋ قىزمەتٸ (روسسەلحوزنادزور) ورىنبور وبلىستىق باسقارماسى 31 تامىز بەن 3 قىركٷيەك ارالىعىندا رەسەي-قازاقستان شەكاراسىنىڭ "ماشتاكوۆو" ٶتكٸزۋ بەكەتٸندە رەسەي اۋماعىنا بەس رەت جٷز توننا كارانتين جارييالانعان ٶنٸمدٸ ٶتكٸزبەك بولعان ەرەكەتتٸڭ جولىن كەسكەن. بۇل تۋرالى 4 قىركٷيەكتە روسسەلحوزنادزوردىڭ رەسمي سايتىندا حابارلاندى.
"تەكسەرۋ كەزٸندە ورىنبور وبلىسىنا فيتوسانيتارلىق سەرتيفيكاتى جوق 20 توننا اسقاباق, فيتوسانيتارلىق قۇجاتى جارامسىز 80 توننا قاۋىن مەن جٷزٸم جەتكٸزٸلگەنٸ انىقتالدى" دەلٸنگەن حابارلامادا.
كارانتينگە قاتىستى زاڭ تالاپتارىنا ساي, قازاقستاننان رەسەي اۋماعىنا كارانتيندٸك ٶنٸمدەردٸ كٸرگٸزۋگە تىيىم سالىنىپ, كٸنەلٸلەر ەكٸمشٸلٸك جاۋاپقا تارتىلعان.
بيلٸك ٶكٸلدەرٸنٸڭ قاداعالاۋىمەن اتالعان كٶكٶنٸستەر رەسەيدەن قازاقستانعا كەرٸ قايتارىلعان.
تامىزدىڭ باسىندا روسسەلحوزنادزور قازاقستان رەسەيگە كارانتيندەگٸ تاۋارلاردى جەتكٸزۋدە ەۋرازييا ەكونوميكالىق وداعى (ەاەو) مەن رەسەيدٸڭ فيتوسانيتارلىق تالاپتارىن جيٸ بۇزا باستاعانىن مەلٸمدەگەن.
