Chocofamily Holding نەگٸزٸن قالاۋشى ەرٸ تەڭ يەسٸ راميل مۋحورياپوۆ FlyArystan ديرەكتورلار كەڭەسٸندەگٸ تەۋەلسٸز ديرەكتور قىزمەتٸن تاعى ٷش جىل اتقارادى, دەپ حابارلايدى ult.kz.
FlyArystan-نىڭ جالعىز اكتسيونەرٸ – Air Astana ونىڭ ٶكٸلەتتٸگٸن 2026 جىلعى 11 قازاننان 2029 جىلعى 10 قازانعا دەيٸن ۇزارتتى. مۋحورياپوۆ بۇل قىزمەتكە العاش رەت 2023 جىلعى قىركٷيەكتە سايلانعان.
ديرەكتورلار كەڭەسٸنە سونداي-اق Air Astana باس ديرەكتورى يبراحيم جانلىەل مەن FlyArystan پرەزيدەنتٸ يوحان ەيدحاگەن كٸردٸ. جانلىەل كەڭەس تٶراعاسى بولىپ سايلاندى.
اكتسيونەر FlyArystan-عا قاتىستى باسقا دا شەشٸمدەر قابىلدادى. كومپانييا Air Astana پايداسىنا جالپى قۇنى 8 ملرد تەڭگە بولاتىن 2 ملن جاي اكتسييا ورنالاستىرادى. سونىمەن قاتار FlyArystan وپەراتسييالىق ليزينگكە Airbus A320neo ۇشاعىن الادى. ۇشاقتى 2026 جىلعى قاراشادا جەتكٸزۋ جوسپارلانعان.
ەسكە سالايىق, مۋحورياپوۆ 2022 جىلى قازاق تٸلٸنە قاتىستى پٸكٸرٸمەن قوعام نازارىن اۋدارعان. رەسەيدەن قونىس اۋدارعاندارمەن كەزدەسۋدە ول قازاق تٸلٸن تٷسٸنەتٸن ادامعا قازاقشا جاۋاپ بەرۋدٸ «بٸرتٷرلٸ» دەپ اتاپ, مۇنى ۇلتشىلدىقتىڭ بەلگٸسٸ رەتٸندە سيپاتتاعان. بۇل سٶزٸ ەلەۋمەتتٸك جەلٸدە قىزۋ تالقىلانعان ەدٸ.
