قاراعاندى وبلىسىندا كليەنتتەردٸڭ اتىنا زاڭسىز نەسيە رەسٸمدەۋ ارقىلى ميلليونداعان تەڭگە جىمقىردى دەگەن كٷدٸكپەن بانك مەنەدجەرٸ ۇستالدى, دەپ حابارلايدى ult.kz.
Polisia.kz مەلٸمەتٸنشە, ساران قالاسىنىڭ پوليتسييا قىزمەتكەرلەرٸ جەدەل-ٸزدەستٸرۋ ٸس-شارالارى بارىسىندا بانكتەردٸڭ بٸرٸندە مەنەدجەر بولىپ جۇمىس ٸستەگەن 23 جاستاعى كٷدٸكتٸنٸ قولعا تٷسٸرگەن.
تەرگەۋ نۇسقاسىنا سەيكەس, كٷدٸكتٸ قىزمەتتٸك مٷمكٸندٸگٸن جەنە كليەنتتەردٸڭ سەنٸمٸن پايدالانىپ, ولاردىڭ كەلٸسٸمٸنسٸز سۇرالعان سومادان ەلدەقايدا جوعارى كٶلەمدە نەسيە رەسٸمدەپ وتىرعان. ال كليەنتتەر ٶزدەرٸنە از مٶلشەردە عانا قارىز بەرٸلدٸ دەپ ويلاعان. ٸس جٷزٸندە ولاردىڭ اتىنا ٸرٸ كٶلەمدەگٸ نەسيەلٸك مٸندەتتەمە رەسٸمدەلگەنٸ كەيٸن بەلگٸلٸ بولعان.
قازٸرگٸ ۋاقىتتا پوليتسيياعا تٶرت ادام جەبٸرلەنۋشٸ رەتٸندە جٷگٸنگەن. الدىن الا ەسەپ بويىنشا كەلتٸرٸلگەن ماتەريالدىق شىعىن 6,9 ميلليون تەڭگەدەن اسادى.
اتالعان فاكتٸلەر بويىنشا قىلمىستىق كودەكستٸڭ 190-بابىنىڭ 2-بٶلٸگٸ ("الاياقتىق") بويىنشا قىلمىستىق ٸستەر تٸركەلٸپ, سوتقا دەيٸنگٸ تەرگەۋ جٷرگٸزٸلٸپ جاتىر.
قازٸر تەرگەۋشٸلەر وقيعانىڭ بارلىق مەن-جايىن انىقتاۋدا. سونىمەن قاتار كٷدٸكتٸنٸڭ وسىعان ۇقساس ٶزگە دە الاياقتىق ەرەكەتتەرگە قاتىسى بار-جوعى تەكسەرٸلۋدە.
پوليتسييا ازاماتتارعا نەسيە رەسٸمدەۋ كەزٸندە بارلىق قۇجاتتى مۇقييات وقىپ, كٶرسەتٸلگەن سومانى جەكە تەكسەرۋگە, سونداي-اق ۇيالى تەلەفوندى, بانكتٸك قوسىمشالارعا قولجەتٸمدٸلٸكتٸ, SMS-كودتار مەن جەكە دەرەكتەردٸ بٶگدە ادامدارعا بەرمەۋگە كەڭەس بەردٸ.
