ٶزبەكستاندا زەينەت جاسىن كەزەڭ-كەزەڭٸمەن ارتتىرۋ جوسپارلانىپ وتىر. قازٸرگٸ قولدانىستاعى تەرتٸپ بويىنشا ەرلەر 60 جاستا, ەيەلدەر 55 جاستا زەينەتكە شىعادى, دەپ حابارلايدى ult.kz.
ٶزبەكستاندا بۇل ٶزگەرٸس پرەزيدەنت جارلىعىنىڭ جوباسىندا قاراستىرىلعان.
جوباعا سەيكەس, 2028 جىلدىڭ 1 قاڭتارىنان باستاپ زەينەت جاسى جىل سايىن ٷش ايعا ۇلعايتىلادى. نەتيجەسٸندە 2039 جىلعا قاراي ەرلەردٸڭ زەينەتكە شىعۋ جاسى 63 جاسقا, ەيەلدەردٸكٸ 58 جاسقا جەتۋٸ تيٸس.
سونىمەن قاتار 2027 جىلدان باستاپ زەينەتاقى تاعايىنداۋ ٷشٸن قاجەتتٸ ەڭ تٶمەنگٸ ەڭبەك ٶتٸلٸن دە بٸرتٸندەپ ارتتىرۋ ۇسىنىلىپ وتىر. قازٸرگٸ جەتٸ جىلدىق تالاپ 2034 جىلعا قاراي 15 جىلعا جەتكٸزٸلمەك.
ەڭ تٶمەنگٸ ەڭبەك ٶتٸلٸ جينالماعان ازاماتتارعا جالپى بەلگٸلەنگەن زەينەت جاسىنا جەتكەننەن كەيٸن بەس جىلدان سوڭ جاسىنا بايلانىستى جەردەماقى الۋ مٷمكٸندٸگٸ قاراستىرىلعان.
جوبا بويىنشا زەينەتالدى جاستاعى ازاماتتارعا دا قوسىمشا كەپٸلدٸكتەر بەرٸلەدٸ. جۇمىس بەرۋشٸلەر ادامدى تەك زەينەتالدى جاسىنا بايلانىستى جۇمىستان شىعارا نەمەسە جۇمىسقا قابىلداۋدان باس تارتا المايدى.
ال جۇمىسسىز رەتٸندە تانىلعان ازاماتتار ٷشٸن زەينەتكە ەكٸ جىل ەرتە شىعۋ مٷمكٸندٸگٸ ساقتالادى.
سونداي-اق جەر استىندا, زيياندى جەنە اۋىر جاعدايدا تولىق جۇمىس كٷنٸ ەڭبەك ەتەتٸن قىزمەتكەرلەرگە ارنالعان جەڭٸلدٸكتەر دە ساقتالماق.
بۇدان بٶلەك, زەينەت جاسىن ارتتىرۋعا قاراماستان, ەرلەر 60 جاستان, ەيەلدەر 55 جاستان باستاپ جەكە زەينەتاقى شوتتارىندا جيناقتالعان قاراجاتىن الا الادى.
