گەربتٸڭ قۇلاۋى, ەسٸكتٸڭ تٷسۋٸ - جاي عانا كەزدەيسوقتىق ەمەس. كٶزبوياشىلىقتىڭ, ساپاسىزدىقتىڭ, جەمقورلىقتىڭ نەتيجەسٸ. وبلىستىڭ ەڭ لاۋازىمدى تۇلعالارىنىڭ الدىندا وسىلاي قيراپ جاتسا, باسقا جاقتا نە بولىپ جاتقانىن بٸر قۇدايدىڭ ٶزٸ بٸلەدٸ.
بەس بالانىڭ ٶلٸمٸ تاعدىردىڭ ٸسٸ دەيمٸز. بٸراق حالىقتى دۇرىس جۇمىسپەن قامتاماسىز ەتۋ, ولاردىڭ وقىپ-بٸلۋلەرٸنە بارىنشا جاعداي جاساۋ, ەلگە باعىت-باعدار بەرٸپ, جان-جاقتى جەتٸلدٸرۋ, ساپالى ۇلت قالىپتاستىرۋ مەملەكەتتٸڭ جاۋاپكەرشٸلٸگٸندەگٸ دٷنيە.
جالپى وتىز جىل از ۋاقىت ەمەس. ەكونوميكا جوق. جاساندىسىنىڭ ٶزٸ قۇلديلاپ قۇلادى. دەموگرافييالىق ٶسٸم دە, ۇلتتىق يدەولوگييا دا جوق. تٸلٸمٸزدٸڭ ەسٸكتەن سىعالاعان سيقى اناۋ. تەۋەلسٸز سوت جٷيەسٸ بولعان ەمەس. ساياسي دۇرىس جٷيە جاسالمادى. جٷيە بٸر كٸسٸگە بايلانعان. مەملەكەتتٸڭ بار بايلىعى تونالعان. جەمقورلىق بار سالانى جايلاعان. كەدەي حالىقتىڭ سانى كٷن ساناپ ارتۋدا. قىمباتشىلىق قىسىپ بارادى. دٸننٸڭ ٶزٸ ساياسيلانىپ, ەلدەبٸر مەكەمەلەردٸڭ قۋىرشاعىنا اينالدى. وي ايتىپ, «قوي» دەيتٸن زييالى قاۋىم جاعىمپازدىقپەن جارىسىپ, ماداق-ماراپاتتىڭ سوڭىندا جٷر. سوندا وتىز جىلدى قالاي اتاپ ٶتۋٸمٸز كەرەك ٶزٸ?
مارقۇم التىنبەك سەرسەنبايۇلىنىڭ: «زاۋىتتى, قالانى قارىزدانىپ بولسا دا سالۋعا بولادى. بٸراق قانداي قوعام, نەندەي جٷيە قالىپتاستىردىڭ? جەتٸستٸك وسىمەن ٶلشەنۋٸ كەرەك», دەگەن سٶزٸ ورىندى ايتىلعان اقيقات سٶز!
قايرات جولدىبايۇلىنىڭ فەيسبۋكتاعى جازباسى
