سۋرەت اشىق دەرەككٶزدەن الىندى
ٶتكەن جىلى قازاقستاندا 113 925 كٶلٸك شىعارىلدى. بۇل 2021 جىلمەن سالىستىرعاندا 21,9%-عا ارتىق.
اقشامەن ەسەپتەگەندە 1,2 تريلليون تەڭگەگە اۆتوكٶلٸك شىعارىلدى, دەپ حابارلايدى Sputnik قازاقستان قازاقستان اۆتوبيزنەس قاۋىمداستىعىنا سٸلتەمە جاساپ.
كٶشباسشى ورىندا قوستانايداعى "Allur" ("سارىارقااۆتوٶنەركەسٸپ") زاۋىتى تۇر. مۇندا 2021 جىلى 60 016 اۆتوكٶلٸك شىعارىلعان بولسا, ٶتكەن جىلى 70 029 اۆتوكٶلٸك شىعارىلدى. الماتىداعى Hyundai Trans Kazakhstan ٶندٸرٸسٸن 37 205 اۆتوكٶلٸككە دەيٸن ارتتىردى. سەمەيدە "سەماز" 2 466 كوممەرتسييالىق كٶلٸك شىعاردى. كٶكشەتاۋدا "كاماز ينجينيرينگ" 1 462 جٷك كٶلٸگٸن, الماتىلىق Hyundai Trans Auto 1 007 كوممەرتسييالىق كٶلٸك, قاراعاندى وبلىسىندا "QazTehna" 568 اۆتوبۋس, Daewoo Bus Kazakhstan 210 تەحنيكا شىعاردى.
سونىمەن قاتار ٶتكەن جىلى قازاقستاندىقتار 123 778 جاڭا كٶلٸك ساتىپ الدى. بۇل 2021 جىلمەن سالىستىرعاندا 5,3%-عا كٶپ.
"جاھاندىق سىن-قاتەرلەرگە, ديستريبۋتسيياسى نەمەسە ٶندٸرٸسٸ رەسەيدە ورنالاسقان اۆتوكٶلٸكتەردٸ جەتكٸزۋدەگٸ پروبلەمالارعا قاراماستان, نارىق ٶز باعىتىن ٶزگەرتە الدى – قازاقستاندا جاڭا برەندتەر پايدا بولدى, ەلدەگٸ جۇمىس ٸستەپ تۇرعان زاۋىتتاردا شىعارىلاتىن اۆتوموبيلدەردٸڭ تٷرٸ كٶبەيدٸ", - دەپ حابارلادى قازاقستان اۆتوبيزنەس قاۋىمداستىعى.
قازاقستاندىقتار قانداي كٶلٸكتەردٸ جيٸ ساتىپ الىپ جاتىر?
Chevrolet 2022 جىلى ەڭ كٶپ ساتىلاتىن كٶلٸكتەردٸڭ وندىعىندا بٸرٸنشٸ ورىندى يەلەندٸ. بۇل برەند نارىقتىڭ 27,7%-ٸن الىپ تۇر. ەكٸنشٸ ورىندا نارىقتاعى 23,32% ٷلەسٸمەن (+27%) Hyundai (28 864 كٶلٸك) تۇر. ٷشٸنشٸ ورىندا Kia – 14 421 اۆتوكٶلٸك. ٷزدٸك بەستٸكتٸ Toyota مەن Lada تٷيٸندەيدٸ.
مودەلدەر بويىنشا Chevrolet Cobalt كٶش باستاپ تۇر. تانىمال مودەلدەر تٸزٸمٸندە سونىمەن قاتار Hyundai Tucson, Chevrolet Nexia, Hyundai Elantra جەنە Hyundai Sonata بار.
