Sýret ashyq derekkózden alyndy
Ótken jyly Qazaqstanda 113 925 kólik shyǵaryldy. Bul 2021 jylmen salystyrǵanda 21,9%-ǵa artyq.
Aqshamen eseptegende 1,2 trillion teńgege avtokólik shyǵaryldy, dep habarlaidy Sputnik Qazaqstan Qazaqstan avtobiznes qaýymdastyǵyna silteme jasap.
Kóshbasshy orynda Qostanaidaǵy "Allur" ("SaryarqaAvtoÓnerkásip") zaýyty tur. Munda 2021 jyly 60 016 avtokólik shyǵarylǵan bolsa, ótken jyly 70 029 avtokólik shyǵaryldy. Almatydaǵy Hyundai Trans Kazakhstan óndirisin 37 205 avtokólikke deiin arttyrdy. Semeide "SemAZ" 2 466 kommertsiialyq kólik shyǵardy. Kókshetaýda "KAMAZ Injiniring" 1 462 júk kóligin, almatylyq Hyundai Trans Auto 1 007 kommertsiialyq kólik, Qaraǵandy oblysynda "QazTehna" 568 avtobýs, Daewoo Bus Kazakhstan 210 tehnika shyǵardy.
Sonymen qatar ótken jyly qazaqstandyqtar 123 778 jańa kólik satyp aldy. Bul 2021 jylmen salystyrǵanda 5,3%-ǵa kóp.
"Jahandyq syn-qaterlerge, distribýtsiiasy nemese óndirisi Reseide ornalasqan avtokólikterdi jetkizýdegi problemalarǵa qaramastan, naryq óz baǵytyn ózgerte aldy – Qazaqstanda jańa brendter paida boldy, eldegi jumys istep turǵan zaýyttarda shyǵarylatyn avtomobilderdiń túri kóbeidi", - dep habarlady Qazaqstan avtobiznes qaýymdastyǵy.
Qazaqstandyqtar qandai kólikterdi jii satyp alyp jatyr?
Chevrolet 2022 jyly eń kóp satylatyn kólikterdiń ondyǵynda birinshi oryndy ielendi. Bul brend naryqtyń 27,7%-in alyp tur. Ekinshi orynda naryqtaǵy 23,32% úlesimen (+27%) Hyundai (28 864 kólik) tur. Úshinshi orynda Kia – 14 421 avtokólik. Úzdik bestikti Toyota men Lada túiindeidi.
Modelder boiynsha Chevrolet Cobalt kósh bastap tur. Tanymal modelder tiziminde sonymen qatar Hyundai Tucson, Chevrolet Nexia, Hyundai Elantra jáne Hyundai Sonata bar.
