اقتٶبە وبلىسىندا جٷرگٸزۋشٸ كۋەلٸگٸنەن ٶمٸر بويىنا ايىرىلعانىنا قاراماستان, ماس كٷيدە كٶلٸك باسقارعان ەر ادام قايتادان پوليتسييانىڭ قولىنا تٷستٸ, دەپ حابارلايدى ult.kz.
وقيعا 27 ماۋسىم كٷنٸ مەرتٶك اۋدانىنداعى اۋىلداردىڭ بٸرٸندە بولعان. ۋچاسكەلٸك پوليتسييا ينسپەكتورى كٷدٸك تۋدىرعان Opel Frontera اۆتوكٶلٸگٸن توقتاتىپ, رٶلدەگٸ 44 جاستاعى جەرگٸلٸكتٸ تۇرعىننىڭ ماساڭ كٷيدە ەكەنٸن انىقتاعان. مەديتسينالىق ساراپتاما ونىڭ الكوگولدٸك ماس كٷيدە بولعانىن راستادى.
تەكسەرۋ بارىسىندا ەر ادامنىڭ بۇعان دەيٸن دە دەل وسىنداي قۇقىق بۇزۋشىلىق جاساعانى بەلگٸلٸ بولدى. ول العاش رەت ماس كٷيدە كٶلٸك جٷرگٸزگەنٸ ٷشٸن جەتٸ جىلعا جٷرگٸزۋشٸ كۋەلٸگٸنەن ايىرىلعان. الايدا بۇل جازا مەرزٸمٸ اياقتالماي جاتىپ, قايتادان ماس كٷيدە رٶلگە وتىرعان. وسى قايتالانعان زاڭ بۇزۋشىلىعى ٷشٸن سوت ونى كٶلٸك قۇرالىن باسقارۋ قۇقىعىنان ٶمٸر بويىنا ايىرعان.
سوعان قاراماستان, ەر ادام زاڭ تالابىن تاعى دا ٶرەسكەل بۇزىپ, كٶلٸك تٸزگٸندەگەن.
قازٸرگٸ ۋاقىتتا اۆتوكٶلٸك مامانداندىرىلعان ايىپ تۇراعىنا قويىلدى. كٷدٸكتٸ ۋاقىتشا ۇستاۋ يزولياتورىنا قامالدى.
اتالعان فاكتٸ بويىنشا سوتالدى تەرگەۋ باستالدى.
