مەدەنيەت جەنە سپورت مينيسترٸ اقتوتى رايىمقۇلوۆا رەجيسسەر گٷلنەر سەرسەنوۆانىڭ «نارتاي» فيلمٸنە قانداي قاتىسى بار ەكەنٸن ايتتى, دەپ حابارلايدى "ۇلت اقپارات".
ورتالىق كوممۋنيكاتسييالار قىزمەتٸندە ٶتٸپ جاتقان بريفينگٸدە باق ٶكٸلدەرٸ مەدەنيەت جەنە سپورت مينيسترٸنەن «نارتاي» فيلمٸنٸڭ ساۋندترەگٸن جازعانى ٷشٸن قانشا قالاماقى العانىن سۇرادى.
اقتوتى رايىمقۇلوۆا ەۋەلٸ ٶزٸنٸڭ مينيستر لاۋازىمىمەن بٸرگە عىلىمي جەنە شىعارماشىلىق ٸستەرمەن اينالىسۋعا قۇقىلى ەكەنٸن ەسكە سالدى.
«مەملەكەتتٸك قىزمەت تۋرالى زاڭنىڭ باپتارى بويىنشا مەملەكەتتٸك قىزمەتشٸلەر پەداگوگيكالىق, عىلىمي جەنە شىعارماشىلىق جۇمىستارمەن اينالىسۋعا قۇقىلى. مىسالى, سٸزدەر جۋرناليست بولىپ جٷرٸپ, مينيسترلٸككە تاعايىندالساڭىزدار نەمەسە مەلەكەتتٸك قىزمەتكە كەلسەڭٸزدەر, ٶز ماماندىعىڭىز بويىنشا جۋرناليستٸك جۇمىسىڭىزدى توقتاتپايتىن شىعارسىزدار. سول سيياقتى مەن مۋزىكا سالاسىنىڭ مامانىمىن», - دەگەن مينيستر «نارتاي» فيلمٸن تٷسٸرۋشٸلەردەن ەشقانداي قالاماقى الماعانىن مەلٸمدەدٸ.
«كومپوزيتور رەتٸندە كٶپ شىعارما جازدىم. بٸراق «نارتاي» فيلمٸنٸڭ ساۋندترەگٸن جازۋعا ۇسىنىس كەزٸندە تٷسكەن بولاتىن. مەن ودان باس تارتتىم جەنە قابىلدامادىم. سوندىقتان ەشقانداي قالاماقى العان جوقپىن, مۋزىكاسىن دا جازعان جوقپىن. بۇل – جالعان اقپارات», - دەدٸ اقتوتى رايىمقۇلوۆا.
