ٷندٸستاننىڭ مۋمباي مەگاپوليسٸندە كوروناۆيرۋس جۇقتىرعاندارعا ارنالعان اۋرۋحانادا بەيسەنبٸدە قايتىس بولعاندار سانى التى ادامعا جەتتٸ, دەپ حابارلايدى "ۇلت اقپارات" Reuters اگەنتتٸگٸنە سٸلتەمە جاساپ.
بۇعان دەيٸن The Times Of India گازەتٸ ەكٸ ادامنىڭ قازا تاپقانى تۋرالى حابارلاعان بولاتىن.
قۇتقارۋشىلار مەن ٶرت سٶندٸرۋشٸلەر ٶرتەنگەن اۋرۋحانادان بارلىعى 76 پاتسيەنتتٸ, ونىڭ ٸشٸندە ٶكپەنٸ جاساندى جەلدەتۋ اپپاراتتارىنا قوسىلعان جەتٸ ادامدى ەۆاكۋاتسييالادى. ولاردىڭ بارلىعى باسقا اۋرۋحاناعا جاتقىزىلدى.
كوروناۆيرۋستى جۇقتىرعاندارعا ارنالعان اۋرۋحانا ساۋدا ورتالىعىنىڭ ٷشٸنشٸ قاباتىندا ورنالاسقان. ٶرت ونىڭ بٸرٸنشٸ قاباتىندا شىققان. تٶتەنشە وقيعاعا كٷردەلٸلٸكتٸڭ ٷشٸنشٸ ساناتى بەرٸلدٸ.
ٶرتتٸڭ شىعۋ سەبەبٸ ەلٸ انىقتالعان جوق, تەرگەۋ امالدارى جٷرگٸزٸلۋدە.
