باس پروكۋراتۋرانىڭ, سىبايلاس جەمقورلىققا قارسى ٸس-قيمىل اگەنتتٸگٸنٸڭ قىزمەتكەرلەرٸ ۇلتتىق قاۋٸپسٸزدٸك كوميتەتتٸڭ جەردەمدەسۋٸمەن گرۋزييادان «بتا بانكٸ» اق-نىڭ بۇرىنعى باسقارما مٷشەسٸ – باسقارۋشى ديرەكتورى اسىلمۇرات رامازانوۆتى ەكستراديتسييالادى, دەپ حابارلايدى "ۇلت اقپارات" باس پروكۋراتۋرانىڭ باسپاسٶز قىزمەتٸنە سٸلتەمە جاساپ.
ول 249 ملرد تەڭگەدەن استام سوماعا بتا بانكٸنٸڭ اكتيۆتەرٸن مۇحتار ەبٸليازوۆتٸڭ ۇيىمداسقان قىلمىستىق قوعامداستىعى مٷشەلەرٸمەن بٸرلەسٸپ ۇرلاعانى ٷشٸن ٸزدەستٸرٸلگەن بولاتىن.
قىلمىستىق جاۋاپتىلىقتان جالتارۋ ماقساتىندا رامازانوۆ قىرعىز رەسپۋبليكاسى ازاماتىنىڭ جالعان تٶلقۇجاتىن پايدالانىپ, گرۋزييا اۋماعىندا جاسىرىنىپ جٷرگەن.
الايدا قازاقستاندىق قۇقىق قورعاۋ ورگاندارىنىڭ گرۋزين ەرٸپتەستەرٸمەن ٷيلەسٸمدٸ جۇمىسىنىڭ ارقاسىندا ول قولعا تٷستٸ.
قازٸرگٸ ۋاقىتتا رامازانوۆ الماتى قالاسى تەرگەۋ يزولياتورىنا قامالدى.
